Кривична пријава против В.К. (39) од охридското село Требеништа е поднесена, поради постоење на основи на сомнение за сторено кривично дело „измама“.

Пријавениот, со намера за себе да прибави противправна имотна корист, во текот на 2010 година, на Н.Д. од Струга му ветил дека за сума од 30 илјади евра може да му направи услуга и преку негови пријатели во Скопје да му набави три нови автомобила „пежо-308“.

Пријавениот В.К. тоа го направил со лажно прикажување и прикривање на факти, и ветување дека трите нови возила ќе ги набавел од авто-салон во Скопје, и во рок од еден месец ќе му ги испорача во Струга.

Тој дури и го повикал оштетениот да дојде и да се сретнат пред авто-салонот „Пежо“ во Скопје, по што го упатил во салонот да си одбере боја на возилата, велејќи му дека вработените знаат, бидејќи му биле блиски пријатели со кои била договорена пониска цена од реалната, односно цена од 10 илјади евра по возило.

Додека оштетениот ги разгледувал возилата, пријавениот го чекал надвор пред авто-салонот.

Откако излегол од авто-салонот и на пријавениот му ја кажал бојата што ја одбрал, оштетениот добил уште едно ветување дека за еден месец ќе ги добие новите возила.

Оштетеното лице, во повеќе наврати на пријавениот му ги исплатил парите, давајќи му дел во готово а дел на трансакциска сметка на еден од неговите родители. /крај/со/бб