Дваесет ичетири годишниот Лирим Руфати е уапсен во Вест Гошин во Пенсилванија и против него е покренато обвинение за силување на неговата 22-годишна сопруга и присилување да се врати во Македонија, објавија американските медиуми.

По едногодишно малтретирање, тепање и силување на сопругата, која одбивала да има односи со него, Руфати на 3-ти јануари ја однел на њујоршкиот аеродром „Џон Ф. Кенеди“, и дал авионски билет за Македонија и ја присилувал да замине од САД.

Во моментот кога жената се оддалечила од Руфати, наместо да се качи во авион, случајот го пријавила во полиција, и со нивна асистенција била вратена дома.

Според исказот на Руфати, родум од Њу Џерси, тој во 2011 година бил во Македонија за склучување на претходно договорен брак меѓу неговиот вујко и таткото на жената.

„Кратко по венчавката, тој почнал физички да ја напаѓа и и се заканувал секогаш кога ќе се налутел. Таа не можела да го напушти“, стои во полициските белешки.

Жената, чиј идентитет не се открива, живеела во стан во Вест Гошин, заедно со Руфати, неговиот татко и брат.

Меѓу причините што жената ги навела зошто досега не ја контактирала полицијата, бил стравот дека „ќе нанесе голем срам на нејзиното семејство доколку замине“.

Но, за постојаното малтретирање, жената на слаб англиски јазик им се пожалила на соседите.

На 2-ри јануари тие слушнале кавга, по што повикале полиција, а жената била однесена во хотел.

На 3-ти јануари, соседите повторно ја повикале полицијата и рекле дека жената против своја волја е однесена на њујоршкиот аеродром, како казна зошто за малтретирањата дознала полицијата.

Руфати е притворен во затворот на округот Честер и му е одредена кауција од 250.000 долари. /крај/мф/ач