По две ослободителни пресуди, првообвинетиот Имер Риза за убиството на таксистот Зоран Трајковски во Визбегово што се случи во 2004. година е осуден на седум години затвор.

Второобвинетиот Шукри Алија кој се товари за помагање, а се поврзуваше со случајот „Монструм“, односно за масакрот кај Смилковското езеро од минатата година, е осуден на десет години затвор.

Станува збор за повторено судење, откако обвинетите за овој случај Имер Риза, кој се товари за убиство и Шукри Алија кој се товари за помагање, добија ослободителни пресуди во 2005 и во 2006 за истото дело.

На претходните судења беше утврдено дека таксистот го убил Рамадан Шити, убиен во полициската акција „Планинска бура“ во Бродец во 2007 година, кој седел на задното седиште, зад совозачот.

Шукри Алија беше екстрадиран од Косово во Македонија во декември минатата година, а Министерството за внатрешни работи повикувајќи се на оперативни сознанија, дента кога Шукри Алија беше екстрадиран, соопшти дека станува збор за еден од најголемите приврзаници и идеолози на радикалниот ислам во Македонија и во поширокиот регион.

МВР не исклучува дека Шукри имал некое влијание врз сторителите на грозоморното убиство кај Смилковци.

„Досега лицето не фигурира во кривичната пријава, којашто беше поднесена од страна на МВР против осомничените сторители и помагачи во врска со грозоморното убиство на Смилковското езеро. Но, сепак, ќе се проверува неговата евентуална инволвираност и неговата евентуална улога, бидејќи не е исклучено дека имал некакво влијание врз сторителите, имајќи предвид фактот дека според оперативните сознанија фигурира како еден од главните идеолози и ментори на следбениците на радикалниот ислам во Република Македонија”, изјави на 5-ти декември Иво Котевски, портпарол на македонското Министерство за внатрешни работи.

Следниот ден, министерката за внатрешни работи, Гордана Јанкулоска не ги коментираше изјавите кои беа пласирани во јавноста за поврзаноста на Шукри Алија со Монструм.

„За секое лице за кое ќе обезбедиме докази дека сторило кривично дело, без размислување ќе поднесеме кривична пријава. МВР не ги коментира медиумските прилози, односно слободата на уредувачката политика на медиумите, МВР поднесува кривични пријави врз основа на докази за сторено кривично дело. Ние ниту од поднесувањето на кривичната пријава до денес немаме нешто ново што би сметале дека треба да додадеме или да смениме“, изјави Јанкулоска.

Името на Алија Шукри се споменуваше и во 2005 година, како еден од учесниците во внатрешните пресметки во исламската верска заедница, како дел од групата која ги претепа имамите во џамијата во Кондово, обидувајќи се да внесат радикални елементи во исламската религија. За овој случај има правосилна пресуда , но за ова дело ќе има повторно судење бидејќи бил осуден во отсуство./крај/мф/фф