Тешка сообраќајна несреќа се случи во вторник утрото на железничкиот премин кај населбата Превалец во Велес, кога патнички воз удри во товарен камион, а возачот од Пробиштип со тешки телесни повреди е згрижен во велешката болница.

„Пациентот е во тешка состојба, контактибилен со бројни скршеници на левата нога и сериска скршеници на ребрата до левата страна. Неговата состојба се следи во зависност од развојот, колегите ќе дејствуваат“, рече др. Силвана Мишкова, портпарол на градска болница Велес.

Додека полицијата правеше увид, сведоците раскажуваа за ужасната случка, јавува велешкиот портал Лисица.

„Седев на терасата, слушнав кочење и во ист момент го слушнав звукот на сирената на возот и знаев дека ќе се случи ова што се случи. Ова вака не може повеќе, страшилиште е тука, преминот не е прегледен, тука мора да има поставено рампи. Истрчав веднаш да му помогнам на човекот. Жив беше, контатктибилен, дојдоа и други луѓе“, вели Илија Ристов.

Покрај жителите, и автопревозниците бараат Македонски железници (МЖ) преминот да го обезбеди со електрични рампи.

„По неколкупати во денот минуваме по овој премин и, верувајте, се плашиме. Не се гледа ништо, наутро сонцето удира право кон нас, ни светло се гледа ниту, пак, се слуша звук. Ние како автопревозници прашуваме што уште треба да се случи за МЖ да стави рампи, толку ли е тоа тешко “, вели преставник на автопревозниците.

Револтот на жителите од Превалец е оправдан, вели градоначалникот Чадиев. Тој за овој проблем веќе го информирал министерот за транспорт и врски, а бара средба и со одговорните од МЖ.

„Барам итна средба со надлежните лица од МЖ, на истата ќе побарам веднаш да се постават електрични рампи на преминот по кој секојдневно минуваат и по неколку илјади луѓе“, рече Славчо Чадиев, градоначалник на Велес.

За пет месеци откако МЖ го повлече вработениот железничар ова е четврта несреќа, во една животот го загуби седумдесетгодишен жител на населбата.

Според надлежните од МЖ преминот е соодветно обележан, светлосната и звучната сигнализација работела и оваа несреќа е резултат на невнимание на возачот./крај/мф/сн