Црна хроника
Откриени три лица што ограбиле златара во Скопје
Скопската полиција поднесе кривична пријава против лицата В.А. (44), В.Г. (48) и Д.Ѓ. (40) поради постоење основано сомневање дека извршиле едно кривично дело – “тешка кражба“, со што се стекнале со противправна имотна корист од 3.600.000 денари (близу 60.000 евра).
Кривичното дело е извршено на 22 март годинава во периодот меѓу 11,45 до 12,20 часот на ул. “Лазар Танев“ во златарски дуќан “Интер голд“ сопственост на Х.З. при што прво и второпријавениот украле разен златен накит (алки, прстени, ланчиња) со вкупна тежина околу два килограма и едно куќиште за компјутер непозната марка црна боја. Имено, тешката кражба В.А. и В.Г. ја извршиле на тој начин што по претходно направен план на 21 март околу 13,30 часот од мобилен телефон кој бил сопственост на В.Г. со СИМ картица купена само за таа употреба телефонски му се јавиле на оштетениот соопштувајќи му дека наредниот ден (22.03.) во времето од 12,00 до 12.30 часот треба да отиде во полициската станица Гази Баба за да го подигне записникот за претходната извршена кражба во неговата златара. По ова вечерта истиот ден пријавениот В.А. на погоден начин се качил на заедничкиот покрив од неколкуте дуќани од каде преку необезбедената баџа влегол во поткровниот дел од златарата каде се притаил и останал до наредниот ден. На 22 околу 11,45 часот кога оштетениот се упатил кон полициската станица Гази Баба од страна на пријавениот В.Г телефонски бил информиран пријавениот В.А. дека дуќанот е празен а овој пак кој по внатрешните скали се симнал во приземниот дел при што насилно ја откорнал таблата од иверица со која бил обезбеден дуќанот односно поделен со скалите кои водат на спратот од каде влегол во дуќанот и од изложниот пулт и од отклучената сеф каса одзел златниот накит како и куќиштето од компјутерот а потоа со буренцето од цилиндричната брава од внатрешна страна ја отворил заклучената врата и незабележан од никого се оддалечил од местото на настанот.Откако двајцата подоцна се состанале кај Дом на занаетчии влегле во ПМВ марка “Пежо партнер“ со скопски регистарски таблички сопственост на В.Г. и отишле на ул.“Васил Ѓоргов“ во поранешната канцеларија на В.Г. сопственост на АПРЗ од каде овој сеуште имал клучеви и таму ги оставиле златните предмети додека куќиштето го искршиле на делови кои ги фрлиле во повеќе контејнери низ градот. Потоа се упатиле и отишле на ручек во Велес. По неколку дена од извршувањето на кривичното дело пријавениот Владимир златните предмети ги однел во златарата “Мак голд“ лоцирана на ул. “Народен Фронт“ во ТЦ “Беверли Хилс“ каде на пријавениот Д.Ѓ. му ги продал за сума од 18.000 евра кои парични средства подоцна заедно со пријавениот В.А. ги поделиле подеднакво.Во просториите на ПСОН „Бит Пазар“ од страна на Д.Ѓ. извршено е препознавање на лица за што истиот со сигурност го препознал пријавениот В.Г дека е лице од кого го купил златниот накит. Исто така пријавениот Д.Ѓ. сторил едно кривично дело – “тешка кражба“ по чл.236 а вв .чл.24 од КЗ на РМ на тој начин што од пријавените В.А. и В.Г. кон крајот на март годинава во неговиот златарски дуќан за сума од 18.000 евра купил поголема количина на златен накит при тоа за истиот накит не издал никаква потврда или документ дека го откупил ниту пак истото го евидентирал. Потоа истиот тој откупен златен накит пријавениот Д.Ѓ. го однел во друг златарски дуќан, во “Рома“ лоциран во старата чаршија и на лицето Љ.Ф. го продал златниот накит за сума од 21.000 евра без да добие никаков документ за откупен златен накит./крај/
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Кривична пријава против четири лица за измами со лажни сообраќајки тешки 3,7 милиони денари
СВР Битола во соработка со Одделот за криминалистичка полиција при БЈБ поднесе кривична пријава до ОЈО Битола против В.П.(40) од с.Стење, ресенско, Г.М.(54) со престој во Скопје, едно непознато лице (третопријавен) и В.М.(51) од Охрид, поради сомнение за сторени кривични дела.
Против прво, второ и третопријавениот е поднесена кривична пријава поради сомнение за сторено кривично дело „Измама“, предвидено и казниво по чл.247 од КЗ, додека четвртопријавената се сомничи дека сторила кривично дело „Помагање“ по чл.24 во врска со чл.247 од КЗ.
На 05.02.2026 година на ул.„Маврово“ во Битола, прво, второ и третопријавениот со лажно прикажување факти довеле во заблуда 72-годишна битолчанка, претставувајќи се дека нејзината снаа е тешко повредена и дека се потребни пари и злато за операција. Оштетената му предала златен накит на првопријавениот, кој подоцна ги предал предметите на второпријавениот. Со делото била причинета штета од околу 40.000 денари.
На 06.02.2026 година кај Саат кулата во Битола, на ист начин измамиле 76-годишна жена и нејзиниот сопруг, од кои одзеле околу 430.000 денари.
Во периодот од ноември 2025 до 21.02.2026 година, второпријавениот и четвртопријавената ги пренесувале и предавале паричните средства стекнати со измами во Р.Бугарија, односно во Софија, на третопријавениот, при што дел од средствата задржувале за себе.
Со измамите извршени во повеќе градови во државата, пријавените се стекнале со противправна имотна корист од околу 3.700.000 денари.
Од страна на судија на претходна постапка при Основен суд Битола на Г.М. му е одредена мерка притвор во траење од осум дена, додека првопријавениот веќе издржува мерка притвор.
Црна хроника
Обвинение за семејно насилство врз бремена девојка во Свети Николе
Основното јавно обвинителство Свети Николе итно ги презеде сите дејствија за обезбедување докази и поднесе обвинение против 21-годишник за нанесување телесна повреда при семејно насилство, што е кривично дело според член 130 став 2 во врска со став 1, како и за противправно лишување од слобода според член 140 став 2 во врска со став 1 од Кривичниот законик, информираат од Обвинителството.
Како што се наведува во соопштението, обвинетиот на 19 и 20 февруари, во семејната куќа во Свети Николе, при вршење семејно насилство, ја ограничил слободата на движење и телесно ја повредил неговата бремена девојка.
„Ја навредувал оштетената со која живееле во семејна заедница, а потоа започнал да ја удира со тупаници. Кога девојката се онесвестила од ударите, ја однел во бањата каде ја освестил со ладна вода, по што почнал да ја влече за коса и повторно да ја удира со боксови по главата и телото. Оштетената од ударите се здобила со повеќе телесни повреди, а кога се обидела да избега обвинетиот и го одзел мобилниот телефон и ја заклучил во спалната соба, каде ја држел 15 часа спротивно на нејзината волја.
Јавниот обвинител, заедно со обвинението, поднесе и предлог за определување мерка притвор за обвинетиот. Во меѓувреме се вршат проверки и во однос на наводи и сомненија за други дејствија на злоупотреби од ова лице кон истата оштетена, кои произлегуваат од нејзиниот исказ даден пред јавниот обвинител“, велат од Обвинителството.
Топ
Од Дубаи екстрадирано лице барано со потерница од македонската полиција, прва екстрадиција од Обединетите Арапски Емирати во нашата земја
Денеска од Дубаи во нашата земја беше екстрадиран 33-годишниот Флорим Лимани, кој беше баран со меѓународна потерница за издржување затворска казна од три години и шест месеци за сторено кривично дело „недозволено изработување, држење и тргување со оружје или распрскувачки материи”, казниво по чл. 396 ст.1 од КЗ.
Ова е прва реализирана екстрадиција на лице од Обединетите Арапски Емирати, кое нашата држава го бара со меѓународна потерница, извести МВР.
Фото: МВР

