Црна хроника
Спречен обид за шверц на девизи и цигари на аеродромот Александар Велики

Царинските службеници на аеродромот Александар Велики спречија два одвоени обиди за нелегално изнесување на 28.480 евра и 110 штеки цигари со македонски и косовски контролни маркички.
Во првиот случај, откако го чекирале својот багаж, двајца македонски државјани се упатиле на излез за царинска контрола, каде изјавиле дека немаат ништо за пријавување. Но, аеродромските служби ги известиле царинските службеници дека еден од патниците носи поголема количина пари. Пристапено е кон личен претрес на двајцата патници, при што кај првиот се пронајдени се 15.280 евра, додека кај вториот патник пронајдени се 17.200 евра.
Согласно Законот за девизно работење резиденти можат слободно да изнесат девизни средства и чекови во висина од 2 илјади евра, а секој износ над овој е забранет. На лицата им се вратени по 2 илјади евра, а остатокот од 28.480 евра се одземени. На сторителите им е понудена постапка за порамнување, а против нив е поведена и прекршочна постапка.
Во вториот случај, кај косовска државјанка која патувала за Лондон царинските службеници пронајдоа вкупно 111 штеки цигари Marlboro Gold и Muratti Аmbassador blue (22.180 парчиња) со македонски и косовски контролни маркички. Цигарите се привремено задржани, а против прекршителот е покрената соодветна постапка.
Инаку, само во првите шест месеци од годинава, спречени се вкупно 59 случаи на шверц на цигари на сите гранични премини во државата, при што се запленети 2.470 штеки цигари и 45 кг режан тутун.
Од нив, само во јануари на Аеродромот Александар Велики откриени се шест случаи на шверц на вкупно 783 штеки цигари од различни брендови кои требало нелегално да бидат пренесени и препродадени во Велика Британија. Вредноста на цигарите во Македонија е скоро четири пати пониска од онаа во Велика Британија, така што прекршителите се надеваат на брза заработка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Топ
Претставувајќи се како божји човек кој крши магии, скопјанец дошол до 400.000 евра од сопружници, барале помош за синот

Педесетчетиригодишен маж од селото Трубарево, скопско, е приведен поради сомнеж за измама, со што се стекнал со противправна имотна корист од околу 400.000 евра.
Според пријава поднесена во полицијата во Штип, од страна на Б.Д. (76) од Берово, во периодот од 2022 до 2025 година осомничениот Д.И. (54) со лажно прикажување на факти го довел во заблуда пријавителот и неговата сопруга М.Д. Притоа се претставувал како „Божји човек“ со наводни паранормални способности – бајач и истерувач на магии, тврдејќи дека над нивниот син е направена магија која го загрозува неговото здравје и живот.

Фото: МВР
Во тој контекст, оштетените во повеќе наврати на различни локации во Скопје и Берово му давале парични средства од 5.000 до 6.000 евра за помош, при што во вкупниот период пријавениот се стекнал со 400.000 евра.
По пријавата, полициски службеници од СВР Штип, во соработка со ОВР Берово, Одделот за криминалистичка полиција и СВР Скопје, а по насоки на јавен обвинител од ОЈО Кочани, спроведоа оперативни активности. Парите што оштетениот имал намера да му ги даде на осомничениот биле претходно крим-технички обработени.

Фото: МВР
На 4 јули во Берово биле приведени Д.И. и неговата мајка Д.И. (76). При претрес кај нив биле пронајдени 3.000 евра, како и други предмети поврзани со делото. По спроведените активности, против двете лица е поднесена кривична пријава и се изведени пред судија за претходна постапка во Основниот суд во Кочани.

Фото: МВР

Фото: МВР

Фото: МВР

Фото: МВР
Топ
Куќен притвор за возачот што го усмрти Југослав на кеј, претходно бил осудуван за насилство и непочитување на ковид мерки

Судот му определи куќен притвор на 25-годишниот скопјанец кој со мотор без дозвола го усмрти Југослав Николовски (68) на пешачка патека на кејот на Вардар кај Паркот на франкофонијата. Обвинителството утрово соопшти дека вложило жалба на одлуката за куќен притвор.
По информацијата дека двапати претходно бил осудуван, од Обвинителството информираа дека дека кај нив е евидентиран со предуда за насилство како малолетник, а потоа и уште една за здравствени прописи во време на Ковид кризата.
Несреќата се случи на 1 јули, кога осомничениот управувајќи мотоцикл „кавасаки“ без дозвола, удри во пешакот Николовски. Според информацијата од Обвинителството, тој возел преку површина наменета за движење на пешаци и не се придржувал кон прописите. Кога дошол во близина на зградата, не ја прилагодил брзината на движење на моторот. Покрај тоа, управувал без да поседува возачка дозвола и на недозволено место, па со левиот страничен дел од мотоциклот удрил во телото на пешакот Југослав Николовски, кој се движел по пешачката патека. При ударот, оштетениот останал да лежи повреден на патеката, а возачот и неговиот сопатник паднале на коловозот.
Пешакот се здобил со тешки телесни повреди поради кои следното утро починал, а полесно повреден бил и сопатникот на моторот. Наместо да укаже помош, осомничениот го оставил мотоциклот и другите двајца повредени и пеш го напуштил местото, соопшти обвинителството.
Обвинителството бараше притвор поради фактот дека осомничениот веднаш по настанот избегал од местото на несреќата и извесен период бил недостапен за органите на прогонот, што за јавниот обвинител е потврда за опасноста тој повторно да се даде во бегство. Дополнителна причина за барањето за притвор е и тоа што претходно бил осудуван.
Топ
17-годишник загина во сообраќајка во Кичево – возел мотор и се судрил со „ауди“

Несреќа со смртни последици се случи вчера во Кичево, пришто животот го загуби 17-годишно момче од овој град, кое управувало мотоцикл „хамачи“.
Околу пладне, на пресекот на улиците Борис Кидриќ и Мирко Милески, тој се судрил со „ауди“ со кичевски регистарски ознаки, управувано од А.Е.(22) од кичевското село Стрелци, соопшти полицијата.
Малолетното момче со тешки повреди не успеало да стигне до клиниката „Мајка Тереза“ во Скопје, пришто за време на транспортот им подлегнало на повредите, а доктор од Итната медицинска помош, констатирал смрт.
Извршен е увид, а врз телото ќе биде извршена обдукција.