Не постои човек што формирал семејство за да направи банда од него или злосторничко здружување, тврди првообвинетиот во случајот „Керозин“, Ангел Пецов, во понеделник, на првото рочиште.

Првообвинетиот, сопственикот на „Алма комерц“ Ангел Пецов ги отфрли кривичните дела што му се ставаат на товар, истакнувајќи дека тој и неговата фамилија не се злосторнички здружени, пренесе Академик.

„Не верувам дека постои човек кој би формирал семејство со намера од него да создаде банда и злосторничко здружување. Ние не сме злосторничка група“, истакна тој.

Првообвинетиот неколку часа го објаснуваше работењето на фирмата „Алма – комерц“ ДООЕЛ Неготино, но и фирмата„ ОИЛ Интернејшенел“ која исто така била во негова сопственост, а според обвинителството била формирана да учествува во постапките за јавни набавки. Дециден е дека преку неговата фирма и другите наведени правни субјекти во обвинителниот акт, не биле сторени кривични дела.

„Фирмата која учествуваше на јавниот повик не е отворена со цел да се изиграат правните прописи“, рече Пецов.

Оправдувајќи ја економската исплатливост во однос на ниските цени на нафтата кои биле нудени на тендерите, рече дека за одредени економско-стратешки цели биле спремни „да работат и на нула“.

Според него, не се основани ниту тврдењата дека до јавните институции биле доставувани помали количини нафта од договореното, а како што истакна, тоа го докажувало и вештачењето.

„Ќе се докаже дека ние уредно сме ги извршувале обврските кон нашите клиенти“, порача првообвинетиот.

Обвинението, освен Пецов, неговата сопруга и син, ги опфаќа и испорачателите на нафтата, но и магационерите на оштетените институции, кои биле задолжени да вршат прием или контрола на испорачките.

Обвинетите се товарат за повеќе кривични дела: злосторничко здружување, злоупотреба на службена положба, фалсификување на исправа, перење на пари и други приноси од казниво дело, даночно затајување, и давање и примање поткуп.

Измамата била направена на тој начин што се користеле идентични цистерни на кои им биле заменувани табличките, односно оние со нафтата која требала да биде испорачана се заменувале со други, кои имаат помалку нафта од потребното, се наведува во обвинителниот акт.

Според полицијата, за да го продаде неиспорачаното гориво, „Алма – комерц“ соработувала со фирми од Косово и Бугарија кои им издавале фиктивни фактури за испорака на гориво.

Се калкулира со бројка од 150 оштетени јавни институции, меѓу кои министерства, општини, здравствени установи, градинки. Според наводите на МВР, Буџетот бил оштетен за речиси два и пол милиони евра.

Поради доцнење на спроводот на обвинетиот, рочиштето почна со доцнење од два часа./крај/а/мф