Две момчиња се повредени во тешка железничка несреќа што се случи синоќа околу 21.30 часот на преминот кај населбата Керамидна во Велес.

Како што јавува велешкиот портал „Лисица“, автомобилот марка „форд“ се движел од градот кон населбата.

Светлосните сигнали на преминот сигнализирале доаѓање на воз, дури пред пругата имало и автомобил кој чекал да помине возот, но момчињата во „фордот“ го заобиколиле автомобилот и тогаш патничкиот воз удрил во нив.

За среќа ударот бил странично во задниот дел на автомобилот, а момчињата од силината на ударот излетале од автомобилот кој завршил во столбот на кој е поставена светлосната сигнализација.

Полицијата извршила увид, а двете момчиња се пренесени на хируршкото одделение во велешката болница.

Од таму информираат дека кај момчињата на возраст од околу 20 години, направени се компјутерски и лабораториски испитувања. Констатирани се повреди на главата, и поради сериозноста на повредите се задржани во болница.

Преминот на кој се случи железничката несреќа е обезбеден со светлосна и звучна сигнализација. Го нема железничарот кој во минатото го регулираше сообраќајот.

Жителите од населбата негодуваат, бараат овој премин да биде обезбедуван од вработен во Македонски Железници./крај/лисица