Поранешниот директор на Управата за безбедност и контраразузнавање, Слободан Богоевски му бил личен консултант на грчкиот бизнисмен Димитрис Кондоминас чија била кипарската фирма „Централ балкан инвестмент ЦБИ“, но тврди дека сè што правел било легално и законски.

Тој ги отфрли сите наводи на обвинението како неосновани, сите докази коишто ги нуделе од обвинителството биле легални акти на државните органи, а сомнежи не поттикнувале ниту доказите прибавени со посебни истражни мерки.

Богоевски пред судот раскажа дека со Кондоминас се познавал од 1993 година, а тој првпат дошол во Македонија во 1997 година и се сретнал со тогашниот шеф на државата и со претседателот на владата, односно со починатиот претседател Киро Глигоров и поранешниот премиер Бранко Црвенковски.

По заминувањето на Богоевски од, како што кажа, владата во 2000 година, му станал личен консултант на Кондоминас и учествувал во голем број успешни проекти во земји од регионот, каде вршел проценка на бизнис ризикот.

Истоимената фирма во Скопје ЦБИ, првообвинетиот адвокат Васко Томановиќ и Богоевски тврдат дека била формирана токму за да се избегне перење пари, односно парите кои требало да им се префрлат ним да не им бидат префрлани во Кипар, туку во Скопје. На Богоевски требало да му префрлат 500.000 евра, а на Томановиќ 50.000 евра.

Првообвинетиот адвокат Томановиќ бил полномошник на фирмата од Кипар и тој ги отфрли сите обвиненија кои му се ставаат на товар.

Обвинетите имаа исцрпни одбрани кои траеја и по два часа. Во случајот „Агент“ обвинети се адвокатите Васко Томановиќ и Владо Пешликовски, Даниела Трајковска и Ален Јегени како управители на фирми и Митја Валич, словенечки државјанин кој е во бегство. На Валич ќе му се суди во отсуство. Сите се товарат дека испрале повеќе од милион евра./крај/мф/фф