На граничниот премин „Табановце“, во петок утрото, царинските службеници спречија обид за шверц на 16 килограми марихуанa.

Имено, во 8 часот, за излез од Македонија на граничниот премин „Табановце“ се пријавило патничко моторно возило марка Mercedes Benz со германски регистарски ознаки управувано од литвански резидент со возачка дозвола издадена од Велика Британија.

Поради сомнително однесување на Литванецот, кој престојувал во Тирана, па Скопје, извршен е детален преглед на возилото при што во подот, под ладицата и во двата калника од предните тркала се пронајдени 28 пакувања со марихуана со различни форми и тежина. Во пакувањата обвиткани во црни најлонски кеси, пронајдена е марихуана со вкупна тежина од 16 килограми.

Од спроведената предистражна постапка утврдено е дека осомичениот тргнал од Литванија кон Германија кај негов пријател кој му го купил возилото со кое тој ја пренесувал марихуаната. Осомничениот од Германија со купеното возило го продолжил движењето кон Албанија преку Унгарија, Србија и Македонија. Во Тирана, Албанија останал 10 дена и таму повторно се сретнал со неговиот германски пријател на кого осомничениот му ги дал клучевите од возилото. По пет дена возилото му било вратено и така подготвеното со сокриена марихуана осомничениот го презел од договореното место и вчера вечер преку граничниот премин Ќафасан се упатил кон Македонија со цел дрогата да ја пренесе до Литванија.

Вредноста на марихуаната во малопродажба на западноевропскиот пазар изнесува 20 евра за една цигара од 1 грам, па така доколку оваа количина би завршила на западно европскиот нарко пазар вредноста би била 320 илјади евра.

Од почетокот на годината до сега откриени се вкупно 21 обиди за пренос на марихуана преку македонската граница, при што се запленети околу 700 кг марихуана.

Против сторителот, Царинската управа поднесе кривична пријава за сторено кривично дело „Неовластено производство и пуштање во промет на наркотични дроги психотропни супстанции и прекурсори“ до надлежното Основно јавно обвинителство во Куманово./крај/со/бб