Осомничениот за масакрот кај Смилковското езеро, Сами Љута кој беше уапсен пред повеќе од два месеца, на 2 декември треба да се појави на суд, а против него ќе биде покренато обвинение.

Јавната обвинителка Гордана Гешковска пред судот изјави дека во текот на денот истражниот судија треба да ги достави до обвинителството списите од истрагата за Сами Љута, по што обвинителството ќе напише обвинение и ќе му предложи на судот на Љута да му се суди заедно со другите шестмина обвинети за масакрот кој се случи на 12 април 2012 година.

Тој е осомничен дека го обезбедувал теренот додека се случувал масакрот кај Смилковци. Ако судот го прифати предлогот на обвинителството, судењето може да почне од почеток.

Обвинителството и одбраната на обвинетите на денешното рочиште предлагаа докази, а судот треба дополнително да се изјасни кој од тие докази ќе бидат изведени.

Вештачењето коешто го побара одбраната покажа дека земјата од неколку локации на Вражји вир, местото кадешто беше пронајден автомобилот „опел омега“, со којшто според обвинението се возеле дел од извршителите на убиството, не се совпаѓа со земјата пронајдена на калниците на автомобилот.

Одбраната рече дека вештачењето е штуро и побара судот да го повика вештото лице коешто го направило вештачењето да даде исказ пред судот.

Одбраната побара судот да се изјасни и за нивното барање, да направат увид во автомобилот „опел омега“ и да бидат изведени како докази слики од телефонот на обвинетиот Агим Исмаиловиќ. Адвокатот Насер Рауфи побара да се утврди сопственоста на автомобилот „опел омега“ и преку царинските служби да се утврди дали е внесен во странство. Обвинитеслтвото се приклучи кон ова барање и рече дека веќе помош побарала од меѓунардона правна помош за да се открие сопственоста на возилото.

Обвинителството, пак, побара да биде изведен како доказ листа на појдовни и дојдовни повици од телефонскиот број на едно од убиените момчиња, Александар Накевски за да се утврди точното време на убиството. Според исказите на таткото на момчето и неговата сестра, тие му звонеле на неговиот број критичниот момент и го слушале неговиот глас испрекинато.

Исто така обвинителката побара како докази да се изведат и пресудите за првообвинетите кои се во бегство, Алил Демири и Африм Исмаиловиќ. Едниот е осудуван за затајување,а другиот за насилство.

Адвокатот на дел од обвинетите, Насер Рауфи изјави дека овие докази немаат никаква врска со обвинителниот акт. Судењето треба да продолжи на 2 декември. /крај/фф