Напаѓачот кој вчера го уби Џелал Ајети од скопско Ченто и рани уште едно лице е се уште во бегство. Од МВР соопштуваат дека трагаат по сторителот, а мотивите за вчерашното убиство официјално се уште не се познати.
Во петокот околу 17.45 часот, во скопската населба Ченто, маскирано и вооружено лице влегло во угостителскиот објект „Ролекс“, во сопственост на 46-годишниот Ајети и со автоматска пушка почнал да пука.
Ајети седел на маса со уште три лица, па во пукањето Ајети е смртно застрелан, а четириесет и деветгодишниот И.М. со прострелни рани во раката и ногата е пренесен во градската болница „Свети Наум Охридски“. Ова е второ убиство во последниве три години во истата чајџилница.
Пред три години таму беше убиено петнаесетгодишно момче, внук на сопственикот кој работел таму како келнер. Полицијата тогаш истражуваше дали станува збор за криминални пресметки и дали цел на нападот бил Џелал, а внукот таа вечер бил случајна жртва.
Неговата куќа беше цел на бомбашки напади на два пати, а во 2009 година беа разнесени паркираните автомобили. Во досието на Ајети стои и инцидентот што се случи во јуни 2008 година во кафуле на кејот на Вардар кога дојде до физичка, а потоа и вооружена пресметка помеѓу две криминални банди./крај/со/фф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
