Во полицијата во Струга било пријавено дека на регионалниот пат од Струга кон селото Враништа се случила сообраќајна несреќа во која учествувале патничко возило „фолксваген голф“ со охридски регистарски ознаки, управувано од Т.А. (57) од Горно Татеши, и велосипед управуван од Р.Ш. (65) од Враништа.

Во несреќата тешки телесни повреди добил велосипедистот, а повредите му биле констатирани во Специјалната болница „Свети Еразмо“ во Охрид.

Увид на местото извршила екипа од ОВР Струга.

Во полицијата во Скопје била пријавена насилна случка во која 15-годишнo девојче било со употреба на физичка сила внесено во автомобил од страна на поранешниот партнер.

Според пријавата, настанот се случил пред два дена околу 19:30 часот, на подрачјето на Ѓорче Петров. Зад нападот стоел  И.Ј. (22), кој притоа физички ја нападнал и ѝ упатувал закани, соопшти МВР.

Полицијата презема мерки за целосно расчистување на случајот, по што ќе следува соодветна пријава.

Полицијата во Штип поднесе кривична пријава против 43-годишниот М.Е. (43) од овој град поради сомнеж за предизвикување на општа опасност.

Според пријавата, на 24 септември 2025 година во селото Љуботен, штипско, тој запалил оган во дворот на семејната куќа и си заминал без да го локализира.

Подоцна огнот повторно се активирал и зафатил две соби од подрумскиот дел на неговата куќа, како и делови од две соседни куќи, гаража и околу пет хектари нискостеблеста вегетација, шума и сува трева.