Во текот на вчерашниот ден Министерството за внатрешни работи во соработка со Јавното обвинителство спроведе полициска акција за апсења на лица кои биле инволвирани во предновогодишните инциденти на Бит Пазар кога група граѓани ги нападнаа полициските службеници во обид да ги спречат во намерата да запленат поголема количина пиротехнички материјали и петарди, соопштуваат од МВР.

Кривична пријава заработија лицата Н.А.(28), С.С.(32), А.Е.(37), С.А.(37), С.А.(32), Е.С.(37), М.Ш.(40) и Џ.Ф.(37), сите од Скопје, поради основано сомневање дека на 29. 12. 2013 во непосредна близина на пешачкиот мост на Бит Пазар, Н.А. со нож прободел полициски службеник, а другите седуммина пријавени спречувале полициски службеници на Единицата за прв одговор и интервенција-АЛФА во вршење на службени дејствија, стои во соопштението на МВР.

Од страна на Судија на Н.А. му е изречена мерка притвор за сторено кривичното дело „напад врз службено лице при вршење работи на безбедноста“, а лицата С.С., А.Е., С.А. и С.А. се товарат за сторено кривично дело „спречување службено лице во вршење службено дејствие“ за што и нив им е одредена мерка притвор.

За истото кривично дело на Е.С., М.Ш. и Џ.Ф. им се изречена мерка внимателност.

Во предновогодишната акција на полицијата за запленување на пиротехнички материјали и петарди со цел спречување продажба на истите полициски службеници на Единицата за прв одговор и интервенција АЛФА привеле две лица кои биле затекнати како на улица нелегално продаваат пиротехнички средства, а во моментот кога лицата биле ставени во едно службено возило, за кратко време се собрала толпа од 500 до 700 луѓе, кои ја блокирале улицата во непосредна близина на аптеката „Зегин“, со што го оневозможиле движењето на полициските службеници.

Во толпата биле сите пријавени, при што А.Н. со физичка сила прво почнал да турка еден полициски службеник, а потоа извадил метална палка и го удрил во пределот на коленото, а другите седуммина пријавени спречувајќи ги полициските службеници во вршењето на нивната должност, овозможиле на толпата да ја земе запленетата пиротехника и да ги ослободи двете лица, кои претходно биле лишени од слобода.

Полицискиот службеник кој бил влечен и туркан од толпата испукал два проектила во воздух за предупредување. Тогаш, А.Н. се повлекол и извадил нож, со кој на полицискиот службеник му нанел убодна рана во задниот дел од бутот, по што службеникот испукал уште два куршума во воздух за да го одбие од себе напаѓачот и масата.

По предупредувачкото пукање од полициските службеници, како и со доаѓањето на седум тимови на Единицата АЛФА на местото на настанот, ситуацијата била ставена под контрола, а толпата почнала да се повлекува низ пазарот и околните улици на Старата скопска чаршија.

Сите пријавени и до сега и биле познати на полицијата како сторители на деликти проследени со насилство, недозволена трговија со оружје, фалсификување пари и имотни деликти за што од надлежен Суд им се изречени затворски казни, а на С.С. и С.А. им се изречени условни казни затвор за недозволена трговија со пиротехнички средства, информираат од МВР./крај/мф/ап