Диџеј од Скопје шверцувал дрога од Романија, а потоа истата ја препродавал, соопшти Министерството за внатрешни работи.

Триесет и двегодишниот Б.Т. од Скопје во текот на минатата година од Романија, каде што работел како диџеј, за сума од 500 евра набавил 100 парчиња синтетичка халуциногена дрога ЛСД, во форма на картонски перфорирана сликовница со апликации “Човек на точак 1943“ и “Алберт Хофман“. Така набавената дрога, Б.Т. нелегално ја внел во Македонија и ја чувал во својот дом за натамошна препродажба.

Полицијата, по добиеното сознание дека Б.Т. се занимава со недозволена трговија, на 9 февруари извршила претрес во неговиот дом при што биле пронајдени 60 хартиени маркици синтетичка дрога ЛСД и други непознати растителни и прашкасти материи, кои се предадени за вештачење.

Против Б.Т. полицијата поднесе кривична пријава за „неовластено производство и пуштање во промет наркотични дроги, психотропни супстанци и прекурсори“, а судот му одреди мерка притвор од 30 денови.крај/мф/сд