Полицијата пронајде десет килограми хероин во автомобил на двајца скопјани на граничниот премин Богородица во понеделник изутрина. Дрогата ја набавиле од Турција, а на пазарот би достигнала цена од 240.000 евра, соопшти Министерството за внатрешни работи.

Синоќа, околу 3.30 часот на ГП Богородица за влез во Македонија се пријавило возило „мерцедес” со скопски регистарски таблички во кое имало две лица, С.С.(32) и И.И.(22), од Скопје.

При царинската контрола над возилото и личен претрес на лицата, во праговите од возилото се пронајдени 19 пакувања обвиткани со селотејп трака исполнети со непозната прашкаста материја во бела боја. Одземената прaшкаста материја била предадена во Одделот за криминалистичко технички испитувања и вештачења при МВР заради вештачење.

Запленетиот хероин при продажба на домашниот нарко пазар на големо би достигнал цена од 240.000 евра, додека надвор од земјава над 300.000 евра.

Лицата се уапсени и по целосно документирање на случајот заедно со кривична пријава поради постоење на основано сомнение дека сториле кривично дело „неовластено производство и пуштање во промет наркотични дроги, психотропни супстанции и прекурсори” ќе бидат предадени на надлежен истражен судија. крај/мф/сд