Црна хроника
Запленети 12 кг марихуана и 7.500 кутии цигари

Дванаесет килограми марихуана и 7.500 кутии цигари заплени полицијата во две одвоени акции во среда на источната и северната граница во делот на Делчево и Танушевци, при што беа приведени вкупно четири лица од кои еден е бугарски и тројца македонски државјани, соопшти во четврток портпаролот на Министерството за внатрешни работи, Иво Котевски.
Имено вчера по претходни сознанија дека криминална група планира криумчарење на дрога кај месноста викана Локвите на државната граница со Бугарија, била поставена заседа, вклучувајќи и сигнални фото – апарати за детекција и фото-сигнализација на движење на овие патишта.
Околу 04.00 часот, утрината, на еден од поставените фото-апарати бил добиен фото-сигнал при што на фотографијата биле забележани две лица како со ранци се движат во правец кон државната граница. Кратко после тоа, од бугарска територија кон нив започнале да се придвижуваат две лица кои навлегле десетина метри во македонска територија. Тогаш реагирала полицијата, а при приведувањето едното од лицата било совладано, а другото успеало да избега во Бугарија, сокривајќи се во шумските предели.
Очекувајќи ги и македонските државјани кои што претходно биле фатени на фото-апаратот, а се уште не пристигнале на криминалната размена, патролата поставила заседа за нивно апсење. По неколку минути, на местото на заседата, од македонска страна се доближиле две лица со две патни торби. Во еден момен се посомневале дека не е се во ред со размената и започнале да бегаат во правец кон шумските предели кон внатрешноста на Македонија, но полициските службеници веднаш реагирале и со трчање започнале да ги бркаат бегалците.
Набргу лицата биле стигнати, совладани и приведени. За време на бегањето, истите од себе ги фрлиле патните торби што ги носеле. Откако биле пронајдени, полицијата извршила увид во торбите при што биле пронајдени десет пакувања со марихуана односно вкупно 12 килограми дрога со висок квалитет која при продажба на нарко пазар на големо во Бугарија би достигнала цена од околу 50,000 евра.
По извршеното легитимирање на уапсените било утврдено дека се работи за двајца жители на село Град на возраст од 30 и 36 години и бугарски државјанин од Благоевград на возраст од 43 години. Од разговорите е утврдено дека еден од македонските државјани остварил неколку средби со бугарските партнери од кои добил инструкции дека треба да преземе марихуана во близина на Делчево и истата за паричен надомест од 500 евра да ја пренесе до границата и да им ја предаде.
Против нив е поднесена кривична пријава за „недозволено производство и пуштање во промет на наркотични дроги, психотропни супстанции и прекурзори”.
Во вториот реализиран случај, до Основното јавно обвинителство за гонење на Организиран криминал – Скопје, поднесена е кривична пријава против 25 годишно лице од село Брест, Скопје, поради постоење на основано сомнение дека извршило кривично дело „криумчарење”.
Имено по претходно добиени оперативни сознанија за лица и возила со кои се вршат криумчарење цигари од Македонија кон Косово, во координирана акција било сопрено возило со скопски регистарски таблички во кое се пренесувало поголемо количество акцизна стока – цигари. Акцијата бил реализирана на локалниот пат од село Бродец кон село Танушевци, во близина на чешмата над викенд населбата Бродец.
Таму било забележано возило „голф” кое не застанало на даден знак од страна на инспекторите, туку ја зголемило брзината на движење и продолжило кон село Танушевци. Возилото било сопрено на месноста викана Раскрсница на оддалеченост од околу два километри од државната граница со Косово, а при извршениот преглед на задните седишта и во багажниот простор од возилото биле пронајдени 7.500 кутии цигари кои, како што рекол уапсениот, ги набавил од лице во село Арачиново.крај/мф/сд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Црна хроника
Притворен 53-годишен дилер од Велес, продал кокаин за 50.000 евра

Основното јавно обвинителство Велес донесе наредба за спроведување истражна постапка против едно лице за кое постои основано сомнение дека сторило кривично дело – Неовластено производство и пуштање во промет наркотични дроги, психотропни супстанции и прекурсори.
„Осомничениот 53-годишник, на 29 ноември 2024 година, неовластено продал 994,8 грама кокаин на лице од Велес. Дрогата се договориле да му ја продаде за 50.000 евра, од кои околу половина од сумата купувачот-сведок оставил на договорена локација пред преземањето на пратката.“, соопшти Обвинителството.
Кокаинот тогаш беше откриен при истрага и претрес во куќа на улицата „Петар Алчев” во Велес, каде се утврди дека еден осомничен преработувал кокаин и тоа од чист кокаин во крек кокаин, а уште две лица во тоа му помагале. Против тие осомничени веќе е изречена првостепена осудителна пресуда, а со дополнителни дејствија се утврди идентитетот и на лицето кое првично ја продало дрогата.
По предлог на јавен обвинител, судија на претходна постапка од Основниот суд во Велес донесе решение со кое на осомничениот му определи мерка притвор.
Црна хроника
Битолчанка сакала да ги убие своите баба и дедо, ги избодела со нож

Полицијата приведе жена од Битола која со нож ги избодела своите баба и дедо.
„По овластување на јавен обвинител од Основното јавно обвинителство Битола, екипи на МВР извршија увид на лице место во куќа на улицата „Солунска“, каде според првичните сознанија, внука при вршење семејно насилство се обидела да ги лиши од живот сопствените баба и дедо, нанесувајќи им повеќе убоди со нож“, соопшти Обвинителството.
Јавниот обвинител издаде повеќе наредби и насоки за целосно расчистување на настанот. Осомничената е лишена од слобода и се постапува за обезбедување докази.
Црна хроника
Полициска акција во Велес: пронајдени кокаин и над 30.000 евра

Одделот за криминалистичка полиција, Одделот за сузбивање на организиран и сериозен криминал и СВР Велес, во координација со јавен обвинител, на подрачјето на Велес спроведоа заедничка и координирана истрага против лица за кои постојат информации дека се инволвирани во случајот на купопродажба на еден килограм кокаин, кој беше запленет на 29.11.2024 и за кој СВР Велес поднесе кривична пријава против три лица.
Како дел од истрагата, денеска (11.06.2025), со наредби од Основен суд Велес, беа извршени претреси на повеќе локации во Велес и велешко.
Претреси беа извршени во куќата на А.В.(53) во Велес, во куќата, станот и викенд куќата на лицето С.С.(47) во Велес и Чашка, во куќа и плац на А.Ц.(29) во Велес и во станот на В.Л.(41) во Велес.
За време на претресите биле пронајдени и одземени кокаин, околу 37.000 евра, дигитална вага со остатоци од кокаин, мобилни телефони и други предмети за кои постои сомнение дека потекнуваат од кривично дело. Исто така, во текот на денот СВР Велес ќе поднесе кривична пријава против уште едно лице по член 215 од Кривичниот законик.