Полицијата го притвори триесет иседумгодишниот П.Д. од село Радолишта, струшко, поради основано сомнение дека бил учесник во грабежот на златарата во Струга што се случи на 30-ти април. Против него и уште против четири за сега непознати лица е поднесена кривична пријава за сторено кривично дело „разбојништво“, соопшти Министерството за внатрешни работи.

Имено, четворицата пријавени извршија разбојништво во златара „Циркон” во Струга на крајот на минатиот месец при што одзедоа поголема количина разновиден златен накит, според кажување на сопственикот во вредност од околу 420.000 евра.

Во грабежот тројца вработени во златарата беа повредени од огнено оружје.

Како што информира МВР, неколку дена пред извршувањето на делото П.Д. од лице од Радолишта купил патничко моторно возило марка „Ауди-100″ без регистарски таблици при што побарал да бидат извршени неколку измени-сечење кај задното седиште, отстранување на плочката и бројките од шасијата, отстранување на каишите за врзување, затемнување со црн спреј на стаклата од автомобилот како и ставање на лажни регистарски таблици.

Возилото било пронајдено по извршување на кривичното дело во близина на македонско-албанската граница.

Основниот суд Струга на П.Д. му одреди мерка притвор во траење од 30 дена. Против него МВР има поднесено кривични пријави за сторени слични кривични дела.крај/мф