Три лица се здобија со тешки телесни повреди во сообраќајна несреќа што се случи во четврток попладне на магистралниот пат Охрид-Кичево, во близина на Ново село, информира охридската полиција.

Поради сериозноста на повредите, по првично пружената медицинска помош во болницата „Св.Еразмо” во Охрид, доцна синоќа во ургентниот центар во Скопје испратени се П.К. (48) и С.П. (46) двајцата од Охрид. Во болницата „Св.Еразмо” задржан е И.П.(24) исто така од Охрид кај кого биле констатирани скршеници во левата натколеница.

Сообраќајната незгода се случила околу 17 часот кога автомобил „Мерцедес” со скопски регистарски ознаки управувано од И.П. движејќи се во правец од Кичево кон Охрид, со цел да избегне директен судар со возило „Голф” кое на полна линија од спротивниот правец претекнувало две товарни возила, излегло надвор од коловозот на десната страна и повторно се вратило на коловозната лента.

Потоа со предниот дел удрило во задните леви тркала на камион „Ивеко” со албански национални ознаки кое се движело во правец од Охрид кон Кичево и се извртело на коловозот.

На местото на тешката сообраќајна незгода извршен е увид во присуство на јавен обвинител од основниот суд во Охрид, овластен судски вештак како и полициски екипи. За време на увидот што траеше до 21 часот, сообраќајот беше пренасочен по локалниот пат низ Ново село.

По наредба на јавниот обвинител, врз патничкото моторно возило „Мерцедес” ќе биде извршено дополнително вештачење и технички преглед.крај/мф/сд