Американскиот претседател Доналд Трамп се сретна со основачот на Амазон, Џеф Безос, во Белата куќа минатата недела, дознава Си-ен-би-си.

Средбата меѓу Трамп и Безос, еден од најбогатите луѓе во светот, траела повеќе од еден час, според две лица запознаени со настанот, кои зборувале под услов да останат анонимни бидејќи разговорот се одржал зад затворени врати.

Амазон не коментирал за средбата. Портпаролот на Џеф Безос не одговорил веднаш на барањето за коментар.

Точната содржина и времето на средбата се непознати.

Според информациите што ги следи програмерот Џек Свини – познат по следењето на приватните летови во сопственост на Илон Маск, Бил Гејтс и други – приватниот авион „Галфстрим Г700“ поврзан со Безос слета во Далес, Вирџинија, во близина на Вашингтон, на 14 јули, а полета следниот ден.

Безос, кој покрај Амазон е сопственик и на вселенската компанија „Блу Ориџин“, се зближи со Трамп за време на неговиот втор мандат. За време на неговиот прв мандат, Трамп често го напаѓаше Безос, особено поради неговото сопствеништво на „Вашингтон пост“.

Безос се појави на сцената со мноштво технолошки директори на инаугурацијата на Трамп во јануари, откако донираше 1 милион долари во инаугуративниот фонд.

Администрацијата на Трамп го пофали Безос за неговата одлука да ги реорганизира уредничките страници на „Вашингтон пост“ за да се нагласат „личните слободи и слободните пазари“.

Во април, Трамп го нарече Безос, кој се повлече од функцијата извршен директор на Амазон во 2021 година, „одличен човек“ и „добар човек“, откако милијардерот го увери дека Амазон нема планови да прикажува дополнителни трошоци поврзани со царините на своите страници.

Во последно време, Безос наводно се обидува да профитира од драматичниот прекин на односите меѓу Трамп и Илон Маск, кој потроши повеќе од 250 милиони долари за да му помогне на Трамп да освои втор мандат и водеше проект за драстично намалување на владините трошоци во Одделот за административна ефикасност.

Фото: принтскрин

Министерството за здравство информира дека согласно најновата прогноза од Управата за хидрометеоролошки работи (УХМР), топлотниот бран со температури над 40°C ќе продолжи до 26 јули 2025 година.

„Имајќи го предвид кумулативниот ефект на продолжената изложеност на високи температури врз здравјето на ранливите категории на население, Владата, на предлог на Министерството за здравство усвои дополнителни препораки за работодавачите, кои ќе важат во периодот од 23 до 26 јули 2025 година:
-Се препорачува ослободување од работни обврски за бремени жени и лица постари од 60 години.
-Каде што е можно, да се овозможи работа од далечина, флексибилно или двократно работно време.
-Овие препораки не важат за вработените во критичната инфраструктура, како што се здравството, полицијата, армијата, транспортот, енергетиката и јавните комунални претпријатија.

Дополнително, Владата потсетува на веќе важечките мерки од акцискиот план:
• Одложување на работниот процес од 11:00 до 17:00 часот за работници изложени на директна топлина.
• Обврска за обезбедување микроклиматски услови за работа – простории со температура до 25°C, освен каде што природата на работата не дозволува поинаку.
• Континуирано информирање на јавноста преку институциите.
• Активирање на интерните протоколи за работа во вонредни услови во сите здравствени установи, домови за стари лица и образовни институции.

Сите останати институции опфатени со Акцискиот план се повикуваат да продолжат со спроведување на своите обврски и активности. Истовремено Министерството за здравство апелира населението да се придржува до постоечките препораки за самозаштита:
• Престојувајте во разладени простории, особено од 11:00 до 17:00 часот.
• Внесувајте доволно течности, избегнувајќи алкохол и засладени пијалоци.
• Носете лесна и светла облека, користете заштита за глава и очи.
• Избегнувајте физичка активност во најтоплите часови.
• Посветете внимание на деца, стари лица, хронично болни и бремени жени – тие се особено ранливи.
• При симптоми како вртоглавица, главоболка, гадење или забрзан пулс – веднаш побарајте медицинска помош.
• Одложете активности на отворено во критичниот дел од денот.
• Обезбедете разладени простории (до 25°C) на работното место и во домот“.

Министерството за здравство, како што соопштуваат од оваа институција, продолжува со дневен мониторинг на состојбата и ќе постапува соодветно согласно проценките и потребите.

Фото: принтскрин

Тринаесет обвинети во предметот „Синдром“ склучија спогодби со Обвинителството и врз основа на тоа Основниот кривичен суд Скопје изрече пресуди, при што првообвинетата е осудена на единствена казна затвор во траење од три години и шест месеци, а на другите, кои се спогодија, им е изречена алтернативна мерка – условни осуди на казна затвор од 1 до 2 години.

По спроведената истражна постапка почната кон крајот на април годинава, Основното јавно обвинителство за гонење организиран криминал и корупција поднесе обвинителен предлог против 36 лица.

Според доказите, обвинетите се организирале во две криминални групи, кои во текот на 2023 година и до април 2024 година посредувале и незаконски овозможувале добивање права на туѓа нега и инвалидска пензија во замена за парични средства. Цената за овие услуги се движела од 150 до 5.000 евра во зависност од видот и времетраењето на правото што се обезбедувало.

Организаторите и припадниците на групите, меѓу кои се и лекари, адвокат и службени лица од неколку јавни установи, ги користеле својата службена положба и реалното влијание за незаконско издавање медицински мислења и одлуки во корист на барателите на права. На овој начин биле заобиколени одредбите од Законот за социјалната заштита.

Во досегашниот тек на постапката 13 обвинети склучија спогодби со Обвинителството и врз основа на тоа Основниот кривичен суд Скопје изрече пресуди, при што првообвинетата е осудена на единствена казна затвор во траење од три години и шест месеци за кривично дело злосторничко здружување, кривично дело давање поткуп и кривично дело примање поткуп, воедно ѝ се одземаат и противправно стекнатите 15.000 евра, а на другите што се спогодија им е изречена алтернативна мерка – условни осуди на казна затвор од 1 до 2 години, која нема да се изврши доколку обвинетите во рок од три, односно пет години, не сторат ново кривично дело. На едно лице од нив му се одзема имотната корист што настанала како резултат на извршување на кривичното дело надоместок за помош и нега од друго лице во вкупен износ од 36.520,00 денари, а на друго лице противправно стекнатата имотна корист од 2.360 евра и 81.000 денари.

Со обвинителниот акт јавниот обвинител му предложи на судот на обвинетите да им бидат продолжени веќе изречените мерки на обезбедување – мерка притвор за пет лица и мерка куќен притвор за пет лица, а за другите обвинети мерки на претпазливост.