Антикорупциската комисија го затвори предметот за именувањето на директорот на АНБ, Бојан Христовски.

За сертификатот по англиски јазик, издаден од училиште во Пловдив, Бугарија, Антикорупциската комисија заклучи дека не е надлежна да вештачи дали документот е фалсификуван, туку тоа е работа на Обвинителството.

„ДКСК изврши увид во сертификатот и формално правно условот е поднесен, односно, поднесен е документ што ги задоволува барањата. Поради претставката за сомневање на автентичноста на наведениот сертификат, ДКСК нема овластување да проверува и утврдува автентичност на документите како ТОЕФЛ сертификатите. Надлежноста за утврдување на евентуалната невалидност на документот е во ОЈО Скопје каде што е поднесена кривична пријава“,  изјави Цвета Ристовска, член на ДКСК.

Во однос на тоа што Христовски лани бил избран за претседател на скопскиот комитет на владејачката ВМРО-ДПМНЕ, додека едниот од условите наведени во Законот за АНБ е дека директорот на оваа агенција не треба да е член на политичка партија или член на органи и тела на политичка партија, од ДКСК велат: „Доставена е изјава со која под полна материјална и кривична одговорност, лицето изјавило дека не е члена на политичка партија, ниту на тела на партија. Оттука, согласно надлежностите на ДКСК, таквата изјава е автентичен доказ тој не е член на политичка партија“.

Антикорупционерите констатираа дека нема основ за постапување по основ на судир на интереси и корупција, а тој ги исполнува условите за вршење на функцијата.

Кривичниот совет при Основниот кривичен суд Скопје, ја одби жалбата на одбраната на поранешниот вицепремиер, Артан Груби.

„Кривичниот совет при Основниот кривичен суд Скопје, постапувајќи по жалба изјавена од одбраната на А.Г., недостапен за органите на прогон, против решението на судија на претходна постапка, донесе одлука со која ја одби жалбата на одбраната и го потврди решението на судија на претходна постапка“, се истакнува во соопштението од судот.

Како што е појаснето во информацијата на 17.12.2024 година Судија на претходна постапка, постапувајќи по предлог на Јавниот обвинител за определување мерка притвор против две лица, поврзани со истрагата за „Државна лотарија на РСМ“, а по добиено известие од МВР дека истите се недостапни за органите на прогон донесе решение со кое го прифати предлогот и на двете лица им определи мерка притвор во траење од 30 дена која започнува да се спроведува од нивно пронаоѓање односно лишување од слобода.

Вонредни инспекции и робусна акција ќе има во следниот период против девијантното однесување на маркетите, кои на сметка на новогодишната кошничка со намалени цени ги зголемија цените на маслото, лебот, млекото, млечните производи, шеќерот, јајцата… Премиерот Христијан Мицкоски, денес, на седница на Владата најави дека ќе бара од Министерството за економија и труд и од Државниот пазарен инспекторат да се преземат конкретни мерки за да се спречат триковите за зголемување на цените што ги користат трговците оти и тој добил информации дека некои од маркетите шпекулираат и се служат со трикови.

„Оние што мислат дека ќе прават трикови се лажат. Не може тоа што ним им беше дадено како право и можност за едни производи сега да го дополнуваат со драматично зголемување на некои други производи што ги користат граѓаните, како што е маслото, лебот, млекото, млечните производи, шеќерот, солта, јајцата и слично. Трикови не може, тоа оваа Влада нема да го толерира и жестоко има да се справиме со сите што мислат дека нè надмудриле“, рече премиерот Мицкоски.

Само неколку дена откога почнаа да важат ограничени и пониски цени на над 1.000 производи, во многу маркети се појавија повисоки цени на производите што се не новогодишната кошничка, која ќе важи еден месец, односно до 15 јануари.

„Апелирам до големите трговски синџири да си го преиспитаат однесувањето и ќе побарам од Пазарниот инспекторат детаљна анализа како изминативе 30 дена е покачена цената на овие производи. Срамота е ова што го прават пред празниците. Сакавме да покажеме добра волја, сакавме да се договориме, видете како враќаат. Ова не е коректно и јас денеска од страна на Владата, од министерот за економија и труд, под чии ингеренции спаѓа Пазарниот инспекторат, ќе побарам вонредна инспекција, робусна акција и ова девијантно однесување со трикови да престане“, најави премиерот Мицкоски, кој робусна акција најави и во судството.

Тој не сакаше да зборува дали ќе следуваат казни за маркетите што имаат драстично зголемени цени и порача дека првин треба инспекциите да излезат на терен за да се одлучи што ќе се преземе понатаму.

Опозицијата уште минатата недела предупреди дека зејтинот е поскап отколку што беше во октомври, а вчера на списокот со производи со зголемени цени ги додадоа јајцата, кашкавалот и јогуртот и обвинија за измама со новогодишната кошничка.