Во петокот се регистрирани три сообраќајни незгоди во кои тешко настрадале двајца возачи на мотоцикли и еден велосипедист, соопшти во саботата министерството за внатрешни работи. 

Околу 7,40 часот наутро во петокот на локалниот пат за селото Балин дол кај Гостивар, се случила сообраќајна незгода во која 37-годишниот О.Е. од селото Дуф, управувајќи моторцикл „сузуки“ удрил во дрво, при што се здобил со тешки телесни повреди, како фрактура на долни екстремитети и на череп.

По незгодата бил пренесен во Медицинскиот центар во Гостивар, од каде поради сериозноста на повредите во неконтактибилна состојба бил пренесен во Ургентниот центар Скопје.

Исто така во петокот, околу 16,50 часот во пробиштипското село Злетово, на земјен пат кај месноста Стари Лозја, 29-годишниот Ј.Ј. (29) од Злетово, управувајќи моторцикл „јамаха“ изгубил контрола и паднал. Притоа се здобил со тешки телесни повреди во вид на скршеница на лева клучна коска и посекотини во пределот на главата. Повредениот бил пренесен во Медицинскиот центар Штип, каде е задржан на лекување.

Во Струга, во петокот околу 12 часот, на улицата „Владо Малески“ се судриле „цитроенЦ3“ со скопски регистерски ознаки управуван од 74-годишниот Т.Ѓ. од Скопје и велосипед управуван од 72-годишниот В.Т. од Струга. Во незгодата со тешки телесни повреди, фрактура на черепот и левата половина од горната вилица и крварење во главата. се здобил возачот на велосипедот, кој бил пренесен во Медицнскиот центар во Струга, од каде поради сериозноста на повредите бил пренесен во болницата „Свети Еразмо“ во Охрид, каде бил задржан на натамошно лекување. /крај/мф/ффс

Извор: Макфакс