Против 36-годишен скопјанец, познат на полицијата како сторител на повеќе десетици разбојништва, поднесена е кривична пријава и одредена му е мерка притвор од осум дена поради разбојништвото извршено пред речиси две седмица во центарот на Скопје, извести во саботата Министерството за внатрешни работи.

Осомничениот идентификуван како А.З. од Скопје поради основано сомнение дека извршил кривично дело „разбојништво“ која на 8-ми февруари околу 20 часот на булеварот „Крсте Мисирков“, поточно на автобуската постојка наспроти МАНУ, од зад грб му пришол на оштетениот, го фатил за капата од јакната оштетениот и насила го повлекол наназад и со сериозна закана дека ќе го убие доколку не му даде пари.

Откако оштетениот одбил да му даде пари, пријавениот со тупаница го удрил во пределот на главата, го претресол и од џебот од тренерките му го одзел мобилниот телефон, а потоа ја протнал раката во внатрешниот џеб од јакната каде пронашол и одзел 370 денари, по што му ги соблекол патиките и јакната, ги одзел истите и со трчање го напуштил местото на настанот.

По преземените мерки и активности од страна на полициски службеници утврден е идентитетот и адресата на пријавениот, и по него била распишана локална потрага и веќе следниот ден по разбојништвото страна на припадниците на полициската единица „Алфа“ бил пронајден и приведен. Кај него се пронајдени работите што ги украл од оштетениот.

Инаку пријавениот е познат сторител на кривични дела од областа на имотните деликти за што од страна на СВР Скопје во временскиот период од 1995 до 2002 година поднесени му се 31 кривична пријава./крај/мф/сн

Извор: Макфакс