Скопјанец на возраст од 58 години во вечерните часови на 4 јули пријавил тешка кражба во неговиот дом.

Според пријавеното, во период од 19:30 до 21:45 часот во куќата насилно влеголо непознато лице кое од една од собите одзело три кеси полни со пари.

Во нив имало банкноти во различни апоени односно 800.000 евра, 60.000 американски долари, 50.000 швајцарски франци и 1.000.000 денари, односно пресметано во евра, имало околу 916.000 евра.

Полицијата презема мерки за расчистување на случајот.

Во утринските часови на 4 јули во полициската станица Карпош, скопјанец пријавил дека 26-годишна Италијанка, била заклучена во стан во Охрид, односно противправно лишена од слобода од 19-годишник од Скопје, со привремено живеалиште во Италија.

По координацијата, на терен излегле полицајци од СВР Охрид и во изнајмен стан на улицата „Партизанска“, била пронајдена италијанската државјнка како и лицето Б.Ф. од Скопје, познаник на споменатиот 19-годишник.

Двајцата скопјани набргу биле приведени во СВР Охрид. За настанот е запознаен јавен обвинител, а од страна на судија на претходна постапка на двајцата приведени им е одреден притвор во траење од по осум дена.

По целосно документирање на случајот против нив ќе бидат поднесени соодветни пријави.

Во вечерните часови на 4 јули во скопската полиција било пријавено дека во градската болница „Св. Наум Охридски“ со повреди од нож бил донесен 29-годишник од скопското селото Батинци, кој за кратко време починал.

Во меѓувреме во болницата со повреди бил донесен и друг жител на Батинци, на возраст од 28 години.

Во Комплексот клиники „Мајка Тереза“, пак, пренесени биле уште двајца селани, 39-годишник повреден од огнено оружје и 25-годишник повреден со нож.

Според првичните информации, во двор на угостителски објект во Батинци, во сопственост на 27-годишник од селото Црн Врв, најпрво дошло до нарушување на јавниот ред и мир, а потоа било употребено огнено оружје и нож.

Полицијата се сомнева дека можен сторител е Н.З. од Батинци кој е во бегство и по кого се трага. На местото на настанот била пронајдена една чаура и два неиспукани проектили.

Се преземаат мерки за расчистување на настанот.