Поранешен раководител на „Проаква“ го оштетил ова струшко јавно претпријатие за околу 14 илјади евра, соопшти Министерството за внатрешни работи.

Поранешниот раководител на јавното претпријатие „Проаква“, А.В. (48) од село Радолишта, струшко, заработи кривична пријава поради постоење основано сомнение за сторени кривични дела „злоупотреба на службена положба и овластување“ и „несовесно работење во службата“.

Пријавениот, искористувајќи ја својата службена положба, на штета на јавното претпријатие прибавил материјална имотна корист од 328.512 денари. Противправната постапка пријавениот ја направил во текот на 2012 и 2013 година, кога од фирма од Скопје подигнал ХТЗ опрема која воопшто не била донесена и прикажана во магацините на претпријатието.

Исто така, пријавениот дополнително го оштетил струшкото јавно претпријатие со кое раководел за 523.500 денари. Тој во текот на 2012 и 2013 со казнено-поправниот дом затвор Струга склучил договор за привремено ангажирање на осум затвореници во „Проаква“ како работници за одржување паркови и зеленило. Од увидот во книговодствените евиденции на двата субјекта, констатирано е дека за секој ангажиран затвореник, КПД наплатил дневница од 500 денари, а ангажираните затвореници најчесто не се појавувале на работното место и не ги извршувале работните задачи./крај/мф/сд