Во утринските часови на 15 мај, во атарот на селото Лактиње, општина Дебрца, полициски службеници извршиле контрола, при што затекнале четири лица од Демир Хисар, како на товарно возило „мерцедес“, вршат утовар на огревно дрво, без соодветна документација.

На местото бил затекнат и шумочуварот К.Д. (53) од Лактиње, кој со чекан за жигосување ги обележал дрвата.

Исто така, при преглед на теренот била пронајдена и поголема количина исечено огревно дрво.

Камионот натоварен со дрва и чеканот за жигосување биле одземени, а по целосно документирање на случајот против лицата ќе биде поднесена соодветна пријава.

Во СВР Тетово, во утринските часови на 15 мај било пријавено дека на работно место во фирма во Гостивар бил пронајден починат гостиварецот Ј.Г. (58).

Екипа на Итна медицинска помош констатирала смрт, а по наредба на Јавен обвинител телото било дадено на обдукција.

Во попладневните часови на 15 мај полициски службеници од СВР Скопје го уапсиле Н.Д. (45) од селото Грчец, кој претходно истиот ден предизвикал инцидент на патот од Грчец кон Сарај.

Како што информираат од МВР, 45-годишникот го пресретнал А.А. (20) од селото Крушопек, и со физичка сила и со закана му го одзел автомобилот „фолксваген голф“, со скопски регистарски ознаки.

Според пријавеното од страна на А.А, причина биле нерасчистени должничко-доверителски односи помеѓу неговиот татко и Н.Д.

Автомобилот бил пронајден, а Н.Д. бил приведен во полициска станица и по целосно документирање на случајот против него ќе биде поднесена соодветна пријава.