Трикратниот убиец од Кавадарци, Тони Станоев го призна убиството, но не и квалификацијата „со умисла“, додека неговата поранешна сопруга пред судот тврдеше дека и претходно им се заканувал на нејзините родители дека ќе ги убие.

Во среда во велешкиот суд започна судскиот процес за трикратното убиство што се случи минатата година во ноември, кога Станоев ги уби родителите и сестрата на неговата поранешна сопруга.Неговата поранешна сопруга објаснуваше како Тони често им се заканувал на нејзините родители велејќи им „Сите ќе ве убијам и ќе ве закопам во семејниот двор. Само кучето ќе го оставам да ве чува“, јавува велешкиот портал „Дума“.Инаку на денешниот главен претрес обвинетиот Станоев го призна кривичното дело убиство но не и квалификацијата „со умисла“. Тој го смени исказот даден во истрага. Велејќи дека е под седативи, има психички проблеми и психијатриски се лекува, денеска Тони тврдеше дека кога лани, попладнето на 9 ноември влегол во куќата на Леови прво имал вербална расправија со Билјана и Снежана. Потоа Билјана го удрила и му го искинала палтото па така паднал пиштолот кој испукал. Неговиот бранител Драган Ѓоргиев рече:„Мало разидување во исказот, даден во истрага и денеска во судница, поточно во делот на пиштолот за кој тврдеше дека го испукал сам првиот куршум што треба во доказна постапка да се прифати како такво. Обвинетиот не е во добра психичка состојба. Ние не тврдиме дека не е во добра психичка состоба туку дека имал психички проблеми и пред настанот, за време на настанот и потоа што е видливо. Слушнавте дека тој ја призна целосната вина но не и дека тоа го сторил со умисла,“ рече Ѓоргиев.За бранителот на оштетената Данче Станоева, Орданчо Темков, обвинетиот даде контрадикторен исказ. Прво ја призна целосната вина а потоа се премисли па сега судот во расправата ќе цени одговорност.„Меѓутоа во делот на изведените и писмените докази кои ние ги имаме на располагање не спорно е дека се докажува оти ги сторил тие три кривични дела по член 123 став 1 со став 3 од КЗ каде е предвидена и казна доживотен затвор. Сметаме дека со наредното рочиште кога ќе бидат сослушани вештите лица ќе се заокружи постапката, судот ќе донесе правилна одлука и кривична санкција за ова кривично дело,“ рече Темков.Инаку додека денеска Данче раскажуваше дека нивниот брак од почеток бил промашување, со секојдневни психички и физички малтретирања од обвинетиот Тони кон неа и двете малолетни деца, поради коцкањето на сопругот, тој пак тврдеше дека по бракоразводната парница бесправно го изгубил старателството над децата поради врските на Леови со Судот и Центарот за социјални работи./крај/мф