Габриел: Косово мора да ги подобри односите со Србија за да напредува кон ЕУ

Германскиот министер за надворешни работи Зигмар Габриел истакнал дека Косово мора да ги подобри односите со Србија доколку сака да напредува на патот кон ЕУ, пренесуваат косовските медиуми.

Германија стои позади своите ветувања за поддршка на земјите од Западен Балкан на патот кон ЕУ, рекол Габриел. „Германија стои зад своето ветување и ги држи вратите отворени“, рекол тој.

По состанокот со косовскиот премиер Иса Мустафа, германскиот министер го повикал косовскиот парламент да го финализира договорот за границата со Црна Гора, со што би се деблокирал договорот за визната либерализација.

Опозициските партии на Косово се спротивставуваат на договорот за границата и засега не е јасно дали тој може да ја добие потребната двотретинска поддршка до парламентот.

Габриел, кој до неодамна беше министер за економија, додал дека ЕУ треба да направи „многу повеќе“ во поддршката за Косово и другите балкански земји, кои работат на исполнување на строгите европски критериуми за членство во Унијата.

Шефот на германската дипломатија особено истакнал дека е потребно за Косово, Србија и другите земји да работат на подобрување на меѓусебните односи да изградат доверба, нешто што е неопходно за идното членство во ЕУ./крај/мф/бс