Градоначалникот блокира, советниците на СДСМ не попуштаат – референдум за спас на Валандово мора да има

Градоначалникот на Валандово, Николче Чурлиновски, го запрел објавувањето на одлуката на Советот на Општината за распишување локален референдум околу продолжување со работа на рудникот Казандол и други рударски комплекси на територијата на општината. Со тоа се пролонгира распишувањето на референдум, но советниците од СДСМ се децидни –  седница повторно ќе биде свикана со цел да се закаже референдумското изјаснување што поскоро. Нивните прогнози се дека референдумот, согласно законските одредби, најрано би можел да се одржи во втората половина на август.

Како што извести граѓанската иницијатива „Спас за Валандово“ на својата Фејсбук страница, Чурлиновски го запира објавувањето на одлуката на Советот за распишување референдум донесена во понеделникот. Во образложението Чурлиновски наведува дека  „Советот не е надлежен за вакви одлуки“ и референдумот би бил „незаконско и неовластено трошење на градскиот буџет“.

Советот ја донесе одлуката во понеделникот, со осум гласа „за“ од вкупно 15 советници. Советниците од ВМРО-ДПМНЕ не присуствуваа на седницата. Советникот од редовите на СДСМ, Перо Костадинов во изјава на Макфакс вели дека во рок од 15 дена Советот повторно ќе се состане и доколку ја потврди одлуката за референдум, тогаш веќе не постои пречка за негово одржување.

„Тогаш нема да се чека на потписот на градоначалникот и одлуката ќе биде објавена веднаш. Согласно законот, референдумот треба да се одржи не помалку од 25 дена, и не повеќе од 40 дена од објавувањето на одлуката“, вели Костадинов. Според него, референдумот би требало да се одржи во втората половина на август и покрај опструкциите од градоначалникот и советниците на ВМРО-ДПМНЕ.