Daily news
Дали етничките Македонци ќе имаат свој претставник во албанскиот парламент?

Вкупно 18 политички субјекти, ќе се натпреваруваат за влез во албанското национално собрание, на парламентарните избори, закажани за 25 јуни.
На кандидатските листи се и тројца етнички Македонци. Генералниот секретар на “Македонска алијанса за европска интеграција” (МАЕИ), Васил Стерјовски, е на листата на коалициското Движењето за социјалистичка интеграција, на албанскиот претседател Илир Мата, кој е истовремено и единствен кандидат на партијата на Македонците – МАЕИ.
Македонците, со Стерјовски, веруваат дека ќе го добијат првиот пратеник предложен од македонската партија, бидејќи е на петто место, од листата за Изборната единица Корча.
На листата на оваа партија, за изборната единица Корча, има уште еден Македонец, Ефтим Митре од селото Глобочани, општина Пустец. Тоа значи дека ќе си конкурираат двајца Македонци, во иста коалиција, затоа што Митре, е кандидат на Движењето за социјалистичка интеграција.
Во истата изборна единица, за влез во парламентот ќе се трка и Македонката Едлира Доневски, по потекло од Мала Преспа, а живее во Корча. Таа, како формален член, е на кадидатската листа на Социјалитичката партија на актуелниот премиер Еди Рама.
На кандидатските листи на опозициската Демократската партија, основана од поранешниот претседател и премиер Сали Бериша, сега предводена од Љуљзим Баша, нема ниту еден кандидат Македонец.
На претходните парламентарни избори во Албанија, кандидат за пратеник, како носител на листа на МАЕИ во Корча, беше Валентина Нестoр, лектор по македонски јазик на Факултетот за странски јазици на Универзитетот во Тирана
Не успеа да влезе во парламентот, иако, и беа потребни 3.500 гласови.
„Актуелната министерка за образование е сопруга на Македонец, додека поранешниот министер е чист Македонец. Но што не е направено за Македонците во Албанија? Речиси – ништо. Ете е главната причина, иако не е единствена“, објаснува за Макфакс Валентина Нестoр.
Таа додава дека за неуспехот мора да се наведат неколку фактори.
„Прво, МАЕИ е нова партија, која во последните неколку години, на избори учествуваше по вторпат, годинава – по трет пат, додека албанските партии дејствуваат низ македонските предели со децении, а тие ограноци се со македонски претставници, кои работат за интересите на овие партии и не поаѓаат од националниот аспект и севкупниот интерес на македонската нација“, додава Нестор.
„Сепак, иако јас лично не успеав, барем успеав да го разбудам националното чувство и да ги освестам дека само со засилување на македонскиот политички фактор, преку коалициските договори, можат да ги уживаат и тие елементарни инвестиции и права кои досега ги имаат. Се годинешните избори, направен е мал напредок, може да се рече-само получекор“, прецизира Нестор.
Професорката Нестор, додава натаму, дека самиот македонски политички фактор не беше и не е доволно обединет и не работеше за една заедничка мисија. Добар дел од Македонците, кои се претставуваат низ Македонија како силни активисти за правата на Македонците во Албанија, се членови на големите албански партии. Сакаат да дејствуваат само преку друштва, а не преку политичка партија. На таков начин користат проекти од македонската влада, а немаат никаква одговорност околу барањето на своите права овде, во земјата каде живееме.
Во желба да ја помогне македонската кауза, барем за престојните избори, Валентина Нестор, како илустрација, потсетува на една сопствена изјава од претхоното гласање.
-Една моја претходна изјава дека роднини на високи членови на МАЕИ работеа против нашата партија и не гласаа, беше протолкувана како, демек, моите роднини не гласале за мене. Сакам да го разјаснам тоа. Моите роднини максимално беа ангажирани околу тоа, не поради фактот што се кандидирав јас, туку затоа што тие се ориентирани кон македонската кауза. Ако сите не размислуваме така, повторно ќе бидеме плен на далеку помоќните албански партии“, предупредува професорката Нестор.
Валентина Нестор потсетува и на еден своевиден парадокс. Имено, како што се знае, Македонците од Албанија учествуваа, на еден или друг начин, и на локалните и на парламентарни избори во Република Македонија. Гласањето на жителите на Пустец во Скопје предизвика огромни реакции и контраверзи, дури градоначалникот на општина Пустец, беше приведен и судски процесуиран.
„Навистина е многу тажно, како се злоупотребува и натаму угледот на Македонецот од Албанија. Сепак, во врска со ова, мора да го истакнам фактот дека голем дел од Македонците, барем од Мала Преспа, се сезонски работници во Македонија, а цели генерации на млади деца, уште од 1991 и наваму, се образуваат во Македонија, а значителен дел од нив остануваат таму. Значи, голем дел од овие Македонци се стекнале со право на престој и добиле документи. Доколку овие лица стекнале права на граѓани на Република Македонија, зошто да немаат право на глас, како и секој граѓанин во демократска земја.Начинот, пак, како тоа беше направено и како потсмешливо и навредувачки, беше третирано и овде во Албанија и таму во Македонија, е сосема друга работа. /крај/мф
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Daily news
Прва правна конференција Tres Partes

На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната

Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера

Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.