Иванов: Мисиите на браќата Кирил и Методиј внесоа импулс во верата и културата на словенските народи

Претседателот на Република Македонија, Ѓорге Иванов, упати честитка по повод одбележувањето на 24 Мај – Денот на македонските и сесловенските просветители и учители, светите браќа Кирил и Методиј.

„Како основоположници на словенската писменост и литература, светите браќа Кирил и Методиј се залагале за развој на христијанската мисла. За важноста и за суштината на просветителската мисија на двајцата браќа, кои внеле нов импулс во верата и во културата на сите словенски народи, говори и фактот што денеска тие се патрони на Европа“, вели Иванов во својата честитка.

„Темел на културолошкиот процес било создавањето на словенската азбука – глаголица.  Но, нивната мисија и нивното сфаќање за развојот и за ширењето на словенската цивилизациска свест се најдобро изразени преку просветителскиот континуитет на Кирилометодиевите ученици, големите дејци свети Климент и свети Наум“, додава Иванов.

„Честитајќи Ви го празникот, дозволете, уште еднаш да ја истакнам важноста од празнувањето на историско-културолошкото и епохално значење на светите браќа како во однос на светската историја, така и во однос на словенството“, порачува Иванов во својата честитка по повод Денот на македонските и сесловенски просветители./крај/мф