Daily news
Кривични пријави за поранешните градоначалници на Ново Село и Василево
![](https://makfax.com.mk/wp-content/uploads/2017/12/policija-ilustracija.jpg)
Секторот за внатрешни работи Струмица поднесе кривична пријава против Б.В. (54) од Ново Село поради постоење основи на сомнение дека сторил кривично дело злоупотреба на службената положба и овластувањето, против А.Б. (54) од с. Мокрино поради постоење основи на сомнение дека сторил кривично дело соизвршителство и против правно лице од с. Мокрино, општина Ново Село.
Во согласност со донесената одлука за отстапување нафтени деривати од задолжителни резерви на нафта и нафтени деривати на Министерството за животна средина и просторно планирање, за чистење речни корита за 2015 година за Општина Ново Село биле доделени 6.000 литри нафта. Од доделените 6.000 литри нафта, на 28.7.2015 година во посебно направени буриња за складирање нафта во подрумските простории на административната зграда во општина Ново Село биле примени 3.000 литри нафта. Б.В., кој извршувал функција градоначалник на општина Ново Село, спротивно на Законот за спречување судир на интересите, во содејство со А.Б., управител и сопственик на правното лице, без да биде спроведена јавна набавка за чистење на речното корито, „Порој канал“ во с. Колешино, на вработен во Општина Ново Село му наредил преостанатите 3.000 литри да бидат источени во цистерна во сопственост на правното лице од с. Мокрино, лоцирана во магацин во Струмица.
Правното лице подоцна ја добило јавната набавка за работата за што од страна на правното лице била изготвена и издадена приемница на 3.000 литри нафта и таа била доставена како доказ за евиденциите во Општина Ново Село дека нафтата е примена. Кога биле источени доделените 6.000 литри нафта за потребите на Општина Ново Село, Б.В., иако бил должен, не водел евиденција за искористените количини нафта ниту, пак, изготвил документција, со што постои основано сомневање дека тој со другите пријавени стекнал противправна имотна корист на штета на Општина Ново Село во висина од 300.000 денари.
Полицијата поднесе кривична пријава и против В.С. (51) од с. Едрениково поради постоење основи на сомнение дека сторил кривично дело злоупотреба на службената положба и овластувањето. Тој како поранешен градоначалник на општина Василево не извршил задолжителен надзор или увид во доставената документација од страна на лице од с. Добрашинци за работно место по спроведен јавен оглас за вработување. Иако знаел дека лицето е без соодветно образование, на 25.6.2010 година му изготвил решение за вработување, со кое го вработил на работно место референт за угостителство, туризам и занаетчиство во одделението за комунални работи и уредување градежно земјиште и локален економски развој во општинска администрација на општина Василево, а бил распореден на работното место во период од 18.8.2010 до 9.3.2012 година. За тоа работно место, во согласност со Правилникот за систематизација на работните места на општинската администрација во општина Василево, било потребно кандидатот да поседува IV степен средна стручна спрема или V степен. Со таковото дејство пријавениот му нанел штета на буџетот на Општина Василево.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
![](https://makfax.com.mk/wp-content/uploads/2024/05/thumbnail_The_Business_of_Pleasure_2.jpg)
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
![](https://makfax.com.mk/wp-content/uploads/2018/03/1-1-3.jpg)
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
![](https://makfax.com.mk/wp-content/uploads/2018/08/gruevski-sud.jpg)
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.