Општина Центар ја усвои одлуката за запирање на 31. ДУП

Советот на Ппштина Центар со мнозинство гласови ја усвои одлуката за запирање на спроведувањето на 31. детален урбанистички план. Советниците од ВМРО-ДПМНЕ гласаа „против“ иако дискутираа дека не се противат на преиспитување на ДУП-овите.

Со одлуката, појаснуваат од Општината, нема да се постапува по новоподнесените барања со кои почнува управна постапка за издавање одобренија за подготвителни работи и постапките за издавање одобренија за градење, доградба и надградба.

„Одлуката ја предложи градоначалникот Саша Богдановиќ. ДУП-овите што се донесени главно во времето кога градоначалник беше Владимир Тодоровиќ од ВМРО-ДПМНЕ и некои од нив се носеа во ноќните часови, не се целосно изработени според законските обврски и правила и се појавуваат недостатоци во урбанистичко-планската документација, која не е во согласност со Генералниот урбанистички план“, велат од Општината.

Богдановиќ наведе дека тие ДУП-ови се носени на јуриш, и тоа во декември 2012 пред да биде донесен Генералниот урбанистички план.

„Претходно донесениот мораториум е краток за да се направи анализа на деталните урбанистички планови и да се овозможат законитост во постапувањето и правна сигурност на жителите на општина Центар, а особено поради неопходната потреба за усогласување на планската документација со законските обврски и фактичката состојба“, стои во образложението.