Реакција на Пиварница Скопје АД за одлуката на Комисијата за заштита на конкуренцијата

Пиварница Скопје АД денеска беше информирана дека Комисијата за заштита на конкуренцијата (КЗК) донела одлука дека некои одредби во одредени договори на компанијата се во колизија со Законот за заштита на конкуренцијата.

Пиварница Скопје АД категорично се противи на оваа одлука и ја изразува својата разочараност од неа.

Од компанијата посочуваат дека во изминатиот период Пиварница Скопје целосно соработуваше во процесот на утврдување на евентуалниот прекршок и со тоа го потврди својот позитивен однос и волја да се расчистат сите отворени прашања.

„Разочарани сме што Комисијата ја донела својата одлука без притоа да ги земе предвид аргументите на Пиварница Скопје АД. Дополнително сме разочарани што Комисијата за заштита на конкуренцијата има изречено неразумно висока казна за Пиварница Скопје, која не е во согласност со претходната казнена политика на Комисијата и воедно не кореспондира со одамна воспоставените практики на други тела надлежни за конкуренцијата во Европа и пошироко“, се вели во реакцијата.

Понатаму се појаснува дека Пиварница Скопје АД длабоко ги почитува правилата на конкуренцијата и е убедена дека денешната одлука ќе биде поништена од страна на судот, каде што компанијата ќе го изнесе случајот.

„Пиварница Скопје АД е присутна на македонскиот пазар повеќе од 93 години и во текот на целиот овој период секогаш постапувала во согласност со законите на Република Македонија“, се вели во реакцијата. /крај/со/ст