Daily news
Сообраќајот во Прилеп е уреден по европски терк

Со зголемувањето на бројот на возила во Прилеп се јави потребата од редефинирање на сообраќајниот и паркинг систем во градот. На повеќе места старите семафори беа заменети со кружни текови кои не предизвикуваат застој во движењето, информираат од Општината.
„За оваа намена се изградија повеќе кружни текови :
- Кружен тек со споменик „Карпалак“
- Споменикот „Прилепски бранители“ кај хотелот Липа
- Кржен тек кај Поштата
- Кружен тек кај поранешна фабрика „Солидност“
Поради одличните ефекти кои се постигнаа со изградбата на кружните текови и намалувањето на сообраќајниот метеж во централното градско подрачје во наредниот период локалната самоуправа на Прилеп планира да изгради уште неколку кружни текови со што дополнително ќе се растовари сообраќајот. Нови кружни текови планирано е да бидат изградени кај :
- Кружен тек на мост „Табана“, кој исто така треба да почне наскоро да се гради
- Кај новата автобуска станица
- Во близина на Економскиот факултет
- Кружен тек кај маркет „Тинекс“, наспроти Домот за култура „Марко Цепенков“
- Како и пред поранешна Градска кафеана во центарот на Прилеп
Паралелно со решавање на проблемите со сообраќајот локалната самоуправа ги решаваше и проблемите со паркинг просторите. Се изгради катна гаража со 400 паркинг места, а во завршна фаза е уште една катна гаража со капацитет од 200 паркинг места. Во план исто така е изградба на повеќе помали монтажни катни гаражи, и тоа кај :
- Позади поранешна Градска кафеана со капацитет од околу 200 возила
- На просторот помеѓу поштата и новата Општинска зграда со капацитет од околу 100 возила
- На просторот пред „Кам маркет“, кај кружен тек „Карпалак“, со капацитет од приближно 100 возила
- На парцелата на постојниот паркинг пред центарот за култура „Марко Цепенков“ со капацитет од приближно 100 возила
Сега Прилеп располага со 1.100 паркинг места распоредени во централното градско подрачје кои ги опслужуваат повеќе од 40 вработени лица. Градот е поделен на три зони за паркирање А, Б и Ц. Воведен е систем и за наплата по пат на СМС порака и грепки.
Наредните планови во однос на платениот паркинг простор се :
- Осовременување на системот на наплата и контрола
- Засадување на повеќе зеленило или изградба на настрешници на постојните паркинзи
- Изградба на паркинзи за тешки товарни возила на периферијата на градот
Крајната цел на сите овие мерки и инвестиции е поголемо користење на јавниот превоз и велосипедите, со што ќе се намали загадувањето на животната средина и ќе се намали сообраќајниот метеж во центарот на градот, се наведува во информацијата на Општина Прилеп.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Daily news
Прва правна конференција Tres Partes

На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната

Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера

Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.