Daily news
Алаѓозовски: „Скопје 2014“ е вирус што треба да го ставиме во карантин и да го третираме изолирано
Што ќе се случува со проектот „Скопје 2014“ и спомениците, Владата ќе одлучува етапно, во неколку фази, бидејќи се работи за сложен проект кон кој треба внимателно да се пристапи, изјави министерот за култура, Роберт Алаѓозовски, на денешниот отчет за сработеното во првите сто дена власт. Петчлена работна група сè уште ја подготвува анализата за објектите од проектот „Скопје 2014“, а првата верзија, која ќе опфати неколку градби, меѓу кои и споменикот на Андон Јанев – Ќосето пред судска палата, ќе биде разгледана по враќањето на премиерот Заев од САД.
– Бидејќи се работи за сложен проект, кој се состои од илјадници споменици, на проблемот му пристапуваме многу внимателно. Овој проект не е вклучен во новата стратегија за развој на културата. Го сметаме за вирус и затоа првин треба да го ставиме во карантин и да го третираме изолирано – изјави Алаѓозовски.
Алаѓозовски ја обвини претходната министерка Елизабета Канческа-Милевска за незаконска употреба на народните пари и непотребно луксузирање, како и предизвикување штета на буџетот за речиси 2,4 милијарди денари, само преку штетни менаџерски договори и договори за закуп.
– Наследивме огромни долгови, само за изведбата на Македонската филхармонија, на празен буџет, државата им должи на изведувачите над 900 милиони денари или околу 15 милиони евра. Преку изводите од службените картички што ги објавивме во јавноста граѓаните имаа можност да дознаат за незаконската употреба на народните пари и луксузирањето на претходната владејачка гарнитура. Во многу установи се забележани договори за огромни хонорари во однос на остварените задачи, на пример, за оркестрирање концерт во Македонската филхармонија биле исплатени 200.000 денари, сценариото за отворањето на Охридско лето чинело 150.000 денари, изведба на сцена за Струшките вечери на поезијата чинела дури 750.000 денари, а е реализирана преку авторски договор со физичко лице, договори без распишување тендер на сума поголема од 30.000 денари во Македонската филхармонија, а да не ја заборавиме и фактурата за коктелот за отворањето на новата зграда на Филхармонијата од 646.200 денари, без спецификација на артиклите, делењето стотици гратиси на партиската свита за отворањето и самиот чин на таканаречено отворање на објектот, без соодветен технички прием, што е тешка злоупотреба на процедурите, што можело да доведе во ризик и нечиј живот – рече Алаѓозовски.
Тој зборуваше и за поднесените законски иницијативи во Собранието, мерките за заштита на македонскиот јазик и на запоставеното културно наследство, се пофали со повеќе од 100 настани во „Новиот културен бран“, почит кон различностите, нацрт-стратегијата за културен развој, транспарентност кон медиумите и отвореност на институциите на културата за сите засегнати страни, нивно ослободување и откривање на злоупотребите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.