Daily news
Андоновски: Малите индустрии не му штетат на воздухот
Малите индустрии (Б-инсталации), кои се во надлежност и контрола на Град Скопје, не биле атмосферски загадувачи, а казните за прекршоци што досега се изречени се однесувале за нарушување на јавната чистота под друг основ. Ова е одговорот до „Макфакс“ на прашањето што констатирал вонредниот инспекциски надзор, кој беше спроведен кон крајот на минатата година.
„Информацијата за казнувањето се однесуваше на правни и физички лица по основ на Законот за јавната чистота, а за отстапување и прекршување на елаборатот за здрава животна средина досега при сите извршени редовни и вонредни инспекциски контроли на Б-инсталациите нема констатирано незаконско работење и казнување. Грешката се провлече поради спомената цифра на вонредно извршени инспекциски надзори на фирми што имаат б лиценци и казните што им се изречени за прекршоци по друг основ за нарушување на јавната чистота, која исто така влијае на животната средина“, не информираат од Градот.
Од секторот надлежен за контрола во Градот, каде што секојдневните и, како што велат, деноноќни контроли, покажуваат дека малите индустрии работат совесно и не му причинуваат штета на воздухот надвор од дозволеното. Станува збор најчесто за градежни локации, фабрики за преработка на месо, бурекчилници, работилници за производство на мебел, текстил и слично.
Вонредниот инспекциски надзор што беше спроведен непосредно пред завршување на минатата година, а за кој Државниот инспекторат за животна средина (ДИЖС), кој постапи по налог на интерсекторската работна група формирана за да се справи со загадувачите и да го истражи амбиенталниот воздух, покажа дека од А-индустриите загадувач е единстевно „Дрисла“, која беше и казнета.
Но, истиот инспекциски надзор спроведен врз индустриите од Б-инсталации што се во надлежност на Градот, според нив, покажува дека се почитуваат пропишаните дозволи. Друга приказна се индивидуалните пријави од граѓани за потенцијални загадувачи, оние што горат гуми за греење и друг штетен отпад, а за кои тие немаат надлежност да постапуваат без налог, освен ако се работи за дворно место или јавна површина.
Според Тиме Андоновски, раководител на овој инспекциски сектор во Градот, искуството покажува дека барем во изминатите две години малите индустрии ги почитуваат пропишаните мерки и се однесуваат во согласност со елаборатите и дозволата за работа.
„Проблемот со аерозагадувањето нè засега сите и ние постојано правиме сè што не во наша надлежност да ги контролирам потенцијалните извори на загадување. Се контролираат градежните објекти, тешките товарни возила, потоа малите месни, текстилни и прехранбени индустрии и не се констатирани отстапувања. Што се однесува до индивидуланите пријави од граѓани, ние можеме да постапуваме само на јавни површини или на приватно дворно место. Дали некој во сопствен дом или објект гори штетен отпад ние не може да увидиме или санкционираме без налог од суд“, ни рече Андоновски.
Меѓу последните мерки, кои на 28 декември беа преземени како итни за да се справиме со загадувањето, беше и бесплатниот јавен превоз. Оваа одлука ја соопшти градоначалникот Петре Шилегов бидејќи два дена едноподруго нивото на ПМ-честичките беше над дозволеното. Покрај бесплатниот превоз, беа стопирани сите градежни активности на градилиштата во надлежност на Град Скопје. Шилегов ги повика и сите скопски градоначалници да донесат одлука за стопирање на градењето, а вработените во Градот да доаѓаат на работа со автобус. Службените возила на Град Скопје ќе се користат исклучиво за потребите на градскиот инспекторат. Градоначалникот Шилегов тогаш рече дека нивните инспектори досега казниле 25 компании, кои не ги почитувале одредбите на Законот за јавната чистота, а биле направени 1.234 контроли. Освен индустријата, како втор најголем виновник за отровниот воздух се посочени домаќинствата, а се очекува дека со гасификацијата барем овој виновник ќе биде елиминиран.
Последниот граѓански протест, за да се најде решение за загадениот воздух, се одржа во саботата, но посетеноста се сведе на 50 граѓани. (А.В)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.