Daily news
Ајатолахот Али Хамнеи ги нарече атентaтите во Техеран како обичен “огномет”
Иранскиот врховен лидер ајатолахот Али Хамнеи ги нарече атентатите во Техеран како обичен “огномет” и изјави дека тој нема да ја спречи борбата на земјата против тероризмот, пренесоа агенциите.
“Овие огномет нема да имаат ефект врз Иран. Тие наскоро ќе бидат елиминирани “, увери тој. “Тие се премногу мали за да влијаат на волјата на иранскиот народ и неговите претставници “, истакна Хамнеи.
Тој додаде дека Иран, кој му помага на сирискиот претседател Башар ал Асад против бунтовниците, вклучувајќи борци на групата “Исламска држава”, спречил потешки напади.
“Ако Иран не беше се исправил против терористите таму каде што е јадрото на овој раскол, сакавме да се соочиме против повеќе напади”, истакна Хамнеи.
Петмина се уапсени во Техеран по нападот и се испитуваат, изјави началникот на полицијата на иранската престолнина Хосеин Саџединија, цитиран од агенцијата ИСНА.
“Исламска држава” објави соопштение со кое ја презеде одговорноста за атентатите во Иран.
Според групата нападите се извршени од петмина нејзини борци, кои користеле пушки, гранати и елеци со експлозиви. Сунитската група се закани кон шиитското мнозинство во Иран со уште напади. Додека во земјата не биде воведено шериатското право, “Калифатот нема да ја пропушти можност да ја пролее крвта”, предупреди ИД.
Многу земји ги осудија двата напади во Иран, меѓу нив и САД, иако двете земји се во изостри односи. При нападите загинаа 12 лица, а над 50 се повредени. Генералниот секретар на ОН Антониу Гутериш ги осуди нападите и изрази надеж дека извршителите ќе бидат изведени брзо пред лицето на правдата.
“Сите земји треба да работат заедно во борбата против тероризмот, како и тоа истовремено да ги поддржат универзалните права и вредности кои ги поврзуваат глобалната заедница”, изјави портпаролот на ОН Стефан Дјужарик.
По извршениот атентат Британскиот министер за надворешни работи, Борис Џонсон изрази солидарност со народот на Иран, пренесе ТАСС.
“Солидарни сме со народот на Иран по овој гнасе атентат. Настана време светот да се обедини против оваа катастрофа”, напиша британскиот шеф на дипломатијата на Твитер. Утринава група вооружени мажи упаднаа со автомати во парламентот во Техеран и отворија оган. Речиси во исто време друга група терористи, меѓу кои и жена камиказа, го нападнаа мавзолејот на основачот на исламската република ајатолахот Хомеини блиску до иранската престолнина. По неколкочасова операција силите за безбедност ги ликвидираа шестмината терористи и ситуацијата и на двете места се нормализира. Одговорноста за нападите ја презеде “Исламска држава”.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.