Daily news
Белградската елита воодушевена од македонската гастрономија и вината на „Стоби“
Македонската традиционална храна и врвните вина на винаријата „Стоби“ изминатиот месец беа единственото нешто што можеше да се најде на менито на елитниот ресторан „Ковач“ во Белград . Во овој ресторан, од 8 до 22 мај се одржуваше манифестацијата „Денови на македонската традиција“ преку која се промовираа храната од земјава и најквалитетните вина од Македонија. Домаќин на оваа традиционална манифестација годинава беше винаријата „Стоби“ во соработка со познатиот белградски ресторан.
Манифестацијата „Денови на македонската традиција“ во Белград привлече бројни гости, љубители на македонските вина и храна. Голем број амбасадори, пејачи, актери, бизнисмени, политичари, книжевници беа само дел од посетителите на ресторанот „Ковач“ кои уживаа во гастрономските специјалитети на познатиот македонски шеф Влатко Огненовски, кого винаријата „Стоби“ специјално го ангажираше за да го осмисли менито за целиот настан. На менито во ресторанот „Ковач“ минатиот месец најактуелни беа различни македонски деликатеси како пинџур, галичко сирење, питулици со праз, модерно тавче гравче, охридски сарми, зајак во сос од дојрански маслинки, кочански ориз со нане, модерна македонска салата, приготвени од Огненовски. Извонредната храна беше дополнета со врвните вина на „Стоби“, меѓу кои се и вината од ексклузивната линија Приватна резерва (Private Reserve) кои се закитија со највисоки признанија на повеќе натпревари низ светот.
Хедонистичкото патување низ македонската традиција почна на свеченото отворање на 8 мај, кога ВИП гостите, освен во вкусната храна и премиум вината на „Стоби“, уживаа и во изворната музика во изведба на македонската група „Љубојна“. Манифестацијата свечено ја отвори амбасадорката на Македонија во Србија, Вера Јовановска – Типко, која нагласи дека ништо не го отсликува толку добро духот на Македонија како нејзините вина, храна и музика.
Од винаријата „Стоби“ се многу задоволни од одзивот и интересот на жителите на Белград за „Деновите на македонската традиција“, како и од бројните позитивни коментари што ги добиваат за нивните вина.
– Манифестацијата наиде на многу голем одзив, а задоволството и воодушевувањето на посетителите во ресторанот беше огромно. Добиваме многу пофалби и прекрасни зборови за целата организација, што ни докажува дека сме го избрале вистинскиот начин за да ја промовираме македонската традиција во Србија. Среќни сме што имаме можност на луѓето во Србија, но и на многубројните странци кои престојуваат во земјата да им ја приближиме македонската гастрономија збогатена со врвните вина од нашите линии – вели Ана Јорданова, главен вински уредник во винаријата „Стоби“.
Со промоцијата на вината на „Стоби“ од линијата Приватна резерва (Private Reserve) на „Денови на македонската традиција“ продолжува успешната регионална презентација на премиум линијата која се одвиваше во ноември минатата година. Доказ за успешната регионална промоција на вината од оваа линија се двата сребрени и двата бронзени медали кои неодамна ги освои „Стоби“ на Балканскиот интернационален вински фестивал во Софија. Со сребрен медал се закитија вината од линијата Приватна резерва „Вердо“ 2012 – 100 % Вердо барик и „Аксиос“ 2013 – 100% Сирак барик, додека бронзен медал добија вината „Веритас“ 2013 – 100% Вранец барик од линијата Приватна резерва и „Класик Р’кацители“ 2016 – 100% Р’кацители.
Со успешното претставување на премиум вината и во другите земји, „Стоби“ ја зајакнува својата позиција во регионот како една од водечките винарии кои доаѓаат од Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.