Daily news
Бугарскиот армиски театар и камерниот оркестар „Турксој“ вечерва на Охридско лето
Петанесеттиот ден од фестивалот Охридско лето е резервиран за театарската претстава „Отело“, во изведба на театарот на бугарската армија, и за концертот на младинскиот камерен оркестар „Турксој“, под диригентство на Анвар Акбаров од Казахстан и Мустафа Мехмандаров од Азербејџан.
Едвај и да има театарска сцена во светот на која не се игра барем една од драмите на Шекспир, а меѓу денешните режисери многумина биле во искушение да допишуваат и препишуваат во духот на денешното време не помнејќи и не знаејќи дека такви обиди се правеле уште од многу одамна.
Во фикцискиот свет кој треба да е слика на големиот вистинскиот свет надвор од ѕидовите на театарот, доброто и злото никнуваат постојано едно до друго. Доброто по самата природа е ранливо. Чесните и благородните луѓе не препознаваат лесно зло кај другите бидејќи не го носат во себе. Тие исто така, поради добрината, не се агресивни и стануваат жртви на туѓата агресија.
Злото, од друга страна, секогаш е незадоволство од состојбата на статус кво и со сите дозволени и недозволени средства се стреми кон поволна промена за себе, притоа, пред сè, за сметка на најдобрите, кои се најлесниот плен, и речиси секогаш успева да ги погуби. Но, порано или подоцна, поради самата ненаситна природа, тоа задолжително се враќа против самиот себе. Но, доброто секогаш е склоно кон сочувство и саможртва…
Режисерот на поставката на „Отело“, Иван Бончев Урумов, е дипломец на академијата за режија, на катедрата кај професор Азарјан во 1993 година. Како професор по режија предава во театрите ДТ „Н.О. Масалитинов“ во Пловдив, Младинскиот театар „Н. Бинев“, ДТ „А. Будевска“ во Бургас, а од 2017 година е режисер во театарот на бугарската армија во Софија. Режисер е на повеќе драми, од кои позначајни се: „Есенска соната“, „Женидба“, „Тартиф“, „Ромео и Јулија“, „Љубовник“ и др. Тој е добитник на повеќе награди и признанија.
„Отело“ ќе се игра на сцената во предворјето на катедралната црква „Света Софија“ со почеток од 21 часот.
За вечерва е предвиден и големиот концерт на младинскиот камерен оркестар „Турксој“, под диригентска управа на Анвар Акбаров од Казахстан и Мустафа Мехмандаров од Азербејџан.
На програмата се „Холберт свитата“ на Грег, концерт за четири виолини на Вивалди со настап на уметниците Рамина Мукушева, Талантбек Молдоканов, Ајдан Саламова и Илајда Зејнеп Коксал, потоа одбрани дела на Чајковски, Шнитке, Гараев, Респиги, Бегалиев, Еркин, Ализадех, Туилиев со солистот Алија Машкајева на виола, и на Сарагов со солистот Рамина Мукушева.
Инаку, Младинскиот камерен оркестар на организацијата за турска култура секоја година ги избира најдобрите студенти од конзерваториумите од земјите членки на „Турској“ со цел промоција на музичкиот талент и турската култура, како и промоција на дела од композитори со турско потекло кои живеат и творат во земјите на организацијата. Од неговото основање во 2010 година оркестарот настапувал заеднички девет пати одржувајќи 40 концерти во сите земји на организацијата, како и во Европа и САД.
Во 2011 година оркестарот го снима првиот носач на звук посветен на 20-годишнината од прогласувањето независност на турските републики, а во 2013 година го снимаат вториот компакт-диск по повод одбележување 20 години од основањето на организацијата „Турској“.
Се издвојуваат настапите на оркестарот на интернационалниот фестивал во Единбург, на фестивалот за млади во Бајројт, како и концертите во престижниот „Линколн центар“ во Њујорк и центарот „Стратмор“ во Вашингтон.
За настапот на камерниот оркестар „Турксој“ од 20.30 часот е резервирана големата сцена на Центарот за култура „Григор Прличев“, а влезот е слободен.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.