Daily news
Вардарки против ФТЦ ја отвораат сезоната во ЛШ
Ракометарките на Вардар, актуелни европски вицешампионки, в петок ќе ја почнат сезоната во Лигата на шампионите. Прв противник на Вардар во Ц групата, во која партиципираат уште Ларвик и Турингер, ќе биде унгарски ФТЦ.
Почетокот на натпреварите во Лигата на шампионите и дуелот со ФТЦ е причината поради која ЖРК Вардар одржа прес-конференција на која говореа тренерот Ирина Дибирова, капитенот Јованка Радичевиќ и претседателот Гордана Нацева.
Вардар од доаѓањето на Сергеј Самсоненко во континуитет учествува на завршниот турнир, три години го освојуваше третото место, а минатата сезона стигна до финалето, но не успеа да ја освои титулата.
„Единствена сме екипа која петта сезона по ред ќе атакува на пласман на завршниот турнир, на кој ќе обидеме да се искачиме скалило повеќе, односно да ја нападнеме титулата. Тимот претрпе одредени измени во однос на минатата сезона, но остана костурот на тимот и тоа ни дава право дека ќе имаме добра основа за добри резултати. На позициите на кои останавме без играчи мислам дека донесовме адекватни засилувања. Посебно ни е драго што се вклучуваат што е можно повеќе домашни играчи, покрај Сара Ристовска, од нашиот јуниорски погон ги вклучивме и Теа Керамитчиева и голманот Јована Мицевска, а летово потпишавме и со репрезентативките Бајрамовска и Саздовска“, рече претседателката Нацева.
Вардарки сезоната во елитата ја отвораат против ФТЦ. Унгарките беа противнички на Вардар и на отворањето на минатата сезона, кога во Скопје во еден тврд и неизвесен натпревар успеаја да освојат еден бод.
Тренерот на „црвено-црните“, Ирина Дибирова, смета дека ФТЦ е добар, организиран тим, кој е фаворит за пласман на завршниот турнир. Слично како и Вардар и ФТЦ го има речиси истиот тим како и минатата сезона, засилен со леворака ракометарка на позицијата десен бек. Во стручниот штаб на Дибирова од оваа сезона е приклучен и шпанскиот тренер Гарсија Парондо.
„Парондо е многу добар тренер, стилот на работа му е ист како на Раул Гонзалес, верувам дека ќе ни донесе добри резултати. Против ФТЦ ние мора на минимум да ги сведеме грешките. Тоа сега ќе ни биде малку проблем бидејќи го сменивме системот, имаме нови играчи. Но, доколку имаме дисциплинирано во одбраната и во нападот, тогаш ќе биде сè в ред“, рече Дибирова, која како играч ја има освоено титулата со Слагелсе (2005) и Звезда Звенигород (2008).
„Зад нас е долг временски период на тренинзи и напорна работа, без некои посилни натпревари. Игравме во регионалната лига, но и таму нема силни противници за да можеме да ја провериме до каде сме со формата. Од друга страна со нетрпение го чекаме стартот на Лигата на шампионките. Свесни сме дека ФТЦ лани ни зеде бод во Скопје и поради тоа сме многу внимателни. Сметам дека може да имаме оптоварување на психички план бидејќи е прв меч во сезоната, но верувам дека сме подготвени, иако во тренинзите не бевме комплетни бидејќи имавме проблеми со повредите. Од понеделникот сме комплетни. Целта е да направиме чекор повеќе од мината сезона, но треба да одиме чекор по чекор. Со агресивна обрана и мирен напад можеме да го победиме ФТЦ“, рече Радичевиќ.
Капитенот на тимот посочи дека најголемата опасност за Вардар е бековската линија на ФТЦ, поради што, како што рече „одбраната во средината ни е многу силна. Знаете, натпревар добивате ако играте добро во нападот, но за да освоите титула мора да играте добра одбрана“.
Натпреварот со ФТЦ се игра в петок во СЦ „Јане Сандански“ од 19 часот. н.ц.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.