Daily news
„Вашингтон пост“: Трамп му диктирал изјава на својот син за средбата со руската адвокатка
Американскиот претседател Доналд Трамп лично диктирал лажна изјава во која неговиот најстар син, Доналд Трамп Помладиот, рекол дека средбата со руската адвокатка Наталија Веселницкаја за време на изборната кампања во 2016 година била фокусирана на посвојување руски деца и дека не било поврзано со изборите во САД, пишува „Вашингтон пост“.
Доналд Трамп Помладиот објави неколку електронски писма од јуни 2016 година, кои покажуваат дека се согласил да се сретне со жена за која му било кажано дека е правна застапничка на руската влада и која може да поседува материјали што може да ѝ наштетат на демократската претседателска кандидатка Хилари Клинтон во битката со татко му.
Весникот пишува дека советниците на Трамп го разгледувале тоа откритие и се согласиле дека Трамп Помладиот треба да даде точна информација за тој настан така што „подоцна не може да се случи да биде доведен во прашања (неговиот исказ) доколку се појават дополнителни поединости“.
Претседателот Трамп, кој на 8 јуни беше на пат во Германија, го променил тој план и „лично ја издиктирал изјавата во која Трамп Помладиот рекол дека со руската адвокатка примарно разговарал за програмата за усвојување руски деца“, пишува „Вашингтон пост“ повикувајќи се на неименувани извори.
Изворите рекле дека во авионот Трамп бил зафатен со работата на изјавата на синот и оти му ја диктирал на советнкот за комуникации Хоук Хикс. Неколку часа подоцна претставници на Трамп Помладиот ја предале изјавата во четири продолженија во весникот „Њујорк тајмс“.
Се наведува и дека во соопштението тогаш испратено до „Њујорк тајмс“, кој се подготвивал да ја објави сторијата, е нагласено дека темата на средбата „не била предмет на кампањата во тоа време“.
Адвокатот на Трамп, Џеј Секулов, изјавил дека во одговорот на текстот на „Вашингтон пост“ напишал „освен што се небитни, описите се погрешни, неточни и не се релевантни“. Адвокатот на Трамп Помладиот, пак, Алан Футерфас, рекол дека тој и неговиот клиент биле потполно подготвени да дадат целосна изјава. За учеството на претседателот во подготвувањето на изјавата тој одговорил дека не располага со докази во прилог на таа теорија.
„Останува нејасно колку претседателот знаел во текот на летот за средбата на Трамп Помладиот“, пишува „Вашингтон пост“.
Дејвид Склански, професор по кривично право на правниот факултет при Универзитетот „Станфорд“, изјави дека Трамп доколку помогнал во составувањето на неточно соопштение за средбата, го зајакнал можниот предмет против себе за попречување на правдата. За да подигнат обвинение за попречување на правото, сојузните иследници мора да докажат дека лицето дејствувало со таква намера, а соопштението дека свесно доведува до заблуда може да се користи како доказ во тоа, вели Склански.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.