Daily news
(ВИДЕО) Заев: Мнозинството ја презема обврската да избере нов собраниски претседател
Лидерот на СДСМ, Зоран Заев денеска и порача на ВМРО-ДПМНЕ, дека новото парламентарно мнозинство има обврска да ја почитува граѓанската волја и да и овозможи на Македонија да оди напред.
„Демократските процеси не се лесна работа, барат трпение, бараат посветеност, бараат грижа за граѓанските и за државните интереси и бараат пред се совест.
Сето тоа го покажавме, како парламентарно мнозинство што ја доби довербата од граѓаните.
Потребна беше мудрост и оставивме сите овие 5 недели или повеќе од 30 дена, целата домашна и меѓународна јавност да се увери на каков лажен партиотизам се подготвени Никола Груевски и раководството на ВМРО-ДПМНЕ.
И веќе за никого нема минимум сомнеж дека раководството на ВМРО-ДПМНЕ не сака да ја предаде власта, бидејки се плаши од одговорност„ рече Заев на прес конференција.
„Бегање од одговорност – нема! Амнестија – нема!„ беше јасен Заев и додаде:
„Тоа е првата работа што сакам да ја порачам. Ќе се оди на суд толку често колку што има основани сомневања за кршење на законот и Уставот. Тоа важи за мене и СДСМ, тоа важи и за сите други во Република Македонија.
Законот ќе биде еднаков за сите. Правдата и правната држава ќе владеат во Р.Македонија.
Сакам уште еднаш јавно, пред целата јавност во Македонија да повторам, за да биде кристално јасно:
•Лага е дека ќе се менува Уставот.
•Лага е дека ќе се носат закони спротивно на Уставот.
•Лага е дека Македонија ќе биде бинационална држава.
•Лага е дека ќе има федерализација или кантонизација.
•Лага е дека ќе се менува уставното име и идентитетот на Македонија.
•Лага е дека ќе се менува знамето, грбот и химната на државата.
•Лага е дека ќе мора да се учи албански јазик во Штип, Прилеп, Гевгелија, Битола.
•Лага е дека ќе има казни ако не се знае Албански јазик.
•Лага е дека ќе се прогласи Македонскиот народ за геноциден.
Сето ова што го слушавте во репликите што сами на себе си ги правеа пратениците на ВМРО-ДПМНЕ за да ги закочат демократските процеси е чиста лага!
Постојат почетни позиции на партиите од албанскиот блок. Преговараше ВМРО-ДПМНЕ. Почна разговори и СДСМ. Но постои финален документ, Програма на новата реформска Влада, што ја штити унитарноста на Македонија и обезбедува квалитетен живот за граѓаните и евро-атлантските перспективи. Тоа е точно!
И сега ќе ви кажам што се друго е точно. Она што беше прифатено од ВМРО-ДПМНЕ, беше прифатено и од нас. Секако се согласивме плус за поддршка за работата на СЈО, тоа од што се плаши раководството на ВМРО-ДПМНЕ поради криминалите зад себе.
•Точно е дека се што сме разговарале, што ќе преговараме и се што ќе работиме во иднина, ќе биде во рамките на Уставот и согласно Уставот на Р.Македонија.
•Точно е дека се што сме разговарале, ќе преговараме и се што ќе работиме во иднина ќе биде во функција на зајакнување на унитарноста на мултиетничка Македонија.
•Точно е дека никој не бара нешто надвор од Уставот, ниту пак некој за нешто уценувал.
•Точно е дека националистичкиот концепт на чиста Македонија нема иднина, колку што е точно е дека единствена иднина има концептот едно општество за сите.
•Точно е дека ќе има закон со којшто ќе се унапреди употребата на јазиците на албанската етничка заедница и на другите етнички заедници. Но тоа ќе биде согласно Уставот и согласно практичната потреба на граѓаните Албанци, но и на другите помалку бројни заедници.
•Точно е дека за новото парламентарно мнозинство нема друга алтернатива освен полноправно членство во НАТО и ЕУ.
•Точно е дека ќе бидеме посветени на реформите, за кои ќе ни треба поддршка и од новата опозиција, ВМРО-ДПМНЕ и за сите кои ќе одлучат да останат во опозиција.
•Точно е дека ќе бараме решение на проблемот што Грција го има со нашето уставно име, но одлуките ќе ги носиме во консензус со опозицијата, а ќе станат конечни по референдум на кој ќе се изјаснат граѓаните.
•Точно е дека ќе стоиме се што можеме да ја унапредиме соработката со сите соседни земји пред се во интерес на граѓаните на Македонија и секако почитувајќи го и интересот на нашите соседи.
•Точно е дека СЈО ќе си ја заврши работата, заради што е и основано.
•И најважното за сите граѓани. Точно е дека Македонија рамномерно економски ќе се развива во секој град и во секое село.
•Точно е дека ќе ви одржиме лекција на идната опозиција на економски план и ќе покажеме што всушност значи економски раст и развој.
•Точно е дека ќе има живот за сите. Македонија ќе биде едно општество за сите. Членот 9 од Уставот кажува се.
И ништо повеќе нема да зависи од поединец. Нема да зависи ништо повеќе ниту од Никола Груевски, ниту од Зоран Заев, ниту од Али Ахмети, Билал Касами, Зијадин Села или Мендух Тачи„ рече Заев.
Лидерот на СДСМ посочи дека институциите ќе носат одлуки.
„Парламентот ќе носи одлуки, а не поединци.
Ќе има конечно транспарентност во Република Македонија. Ќе има конечно одговорно управување во Република Македонија.
Ние како идна власт во државата, подготвени сме во име на одговорното управување да соработуваме со идната опозиција. Ќе си се сакаме по дома со нашите деца и семејства. Овде ќе мораме да соработуваме, заради реформите ќе ни треба соработка, заради животот и соживотот ќе ни треба соработка, заради граѓаните, заради нашата заедничка земја Република Македонија.
Порачувам, парламентарното мнозинство нема да дозволи опозицијата во Собранието, Трајко Вељаноски и пратениците на ВМРО-ДПМНЕ да продолжат да ги кршат Деловникот, законите и Уставот на Република Македонија. Никој нема право да се изживува и да ги тероризира граѓаните, со неизвесност, со загрозување на егзистенцијата, со креирање нестабилност, со блокада на институциите.
Државен интерес број еден е да се одблокираат демократските процеси и Македонија конечно да добие институции што ќе работат во полн капацитет.
Ја преземаме обврската да продолжиме демократските процеси со избор на нов претседател на Собранието и тоа токму од редот на оформеното и декларирано мнозинство кое постои во Парламентот„ истакна на денешната прес конференција лидерот на СДСМ, Зоран Заев..крај/мф/кс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.