Daily news
(Видео) Ненов тврди дека шест корумпирани извршители го цедат народот
Преку лов на корумпирани извршители група граѓани најавија дека ќе дејствуваат против групата од 5-6 извршители што ги гледаат како корумпирани и главната цел им е лично богатење. Тие велат дека многупати го повикале Основното јавно обвинителство да поведе постапка по допрен глас, но тие молчеле. Марјан Ненов од здружението „Но пасаран“ вели дека постојат кланови на извршители кои фамилијарно се поврзани со нотари и со Комората на нотаријатот, кои, како што вели, ги демнат граѓаните.
„Група извршители го кршат Законот за извршувањето и тие се под заштита на Комората на извршителите. Се сомневаме дека нема рамномерното распределување на случаите, каде што како побарувачи се јавуваат комуналните претпријатија. Гледаме дека група од 5-6 привилигирани извршители ги земаат сите предмети, а се здружени со Комората“, вели Марјан Ненов од здружението „Но пасаран“.
Законот за извршувањето, кој носи поволности за доверителите, должниците и за извршителите, а пред сè за ранливите категории граѓани, Ненов го оценува како недоработен, а со тоа барањето извршителите да бидат повторно под ингеренции на судот да се применува.
„Ние го повикуваме Министерството за правда да нè повика на јавна расправа, да ги вклучи граѓанските организации заедно со граѓаните на кои се применуваат овие закони и да дадеме свое мислење за измена на овој закон“, додава Ненов.
Граѓанин кој вчера ја примил пензијата вели дека бил изненаден кога видел дека половина од пензијата му била одземена. Кога отишол во пензискиот фонд, му кажале дека извршителот Зоран Димов, кој патем е претседател на Комората на извршителите, постапувајќи по решение, му ги повлекол средствата од банкарската сметка. За ова тој не бил известен.
„Извршителот полудел начисто. Бев во комората, ме препратија кај него. Сега ќе треба да се извинувам, да молам. Јас сум без половина пензија. Земам 10.700 денари пензија, сега подигнав 5.000 денари. Ова е резултат на тоа што извршителите не знаат што прават. Тие се изгубени до таа мера што се спобудалени. Неук народ, ако можат уште малку да го доцедат, тоа е добро за нив. Состојбата станува страшна, сите се во цајтнот. Тие од нас сакаат да излечат максимум. Новата власт требаше да ја прикочи оваа работа“, вели граѓанин, кој беше на протестот пред Комората на извршителите.
На пример, за неплатена сметка од 5.000 денари, сума што треба да ја плати должникот, некогаш вкупната сума за наплата може да достигне до 17.000 денари, од кои за камати и судски такси одат околу 1.500 денари, за адвокатски и нотарски трошоци од 9.000 до 10.000 денари, а извршителот наплаќа 2.500 денари. Новиот закон сè уште се крои. Сè уште не се познати деталите од содржината, а не се знае ниту кога ќе се стави на гласање пред пратениците. Она што е познато е дека измените се во насока од извршителите да се ослободат најсиромашните граѓани.
К. Ландов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.