Daily news
(ВИДЕО) Петар Арсовски: „Столе Попов ми дужи до балчак“
Две години по премиерата на филмот „До балчак“, скап и амбициозен проект, најавен како од висок нациoнален интерес, не ги врати долговите кон дел од учесниците во филмската екипа и угостителската логистика на филмот. Иако речиси сите судски тужби кон продуцентот се пресудени во корист на оштетените, тие не можат да ги наплатат долговите.
Во разговор со некои од нив, велат продуцентот го пренасочи филмот од „национален во личен интерес“.
За овие спорни финасиски одлуки, како и за валидноста на проектот кој државата ја чини близу 3 милиони евра, одговорност не презема никој. Последно ветување оштетените добиле од тогаш актуелниот директор на Агенцијата за филм, Дарко Башевски, кој им рекол дека со дистрибуцијата, односно продажбата на филмот, ќе бидат вратени долговите.
Освен скандалите околу овој филм, што почнаа на неговата премиера пред две години, а предизвикани од режисерот Столе Попов, долговите и општо лошиот впечаток кај публиката, критиката го оцени како лош и непотребен филм во македонската кинематографија.
Актерот Петар Арсовски, еден од оние на кои до денес не им е исплатен хонорарот, вели дека уште во процесот на снимање се чувствувало дека кретивноста и желбата да се направи добар филм биле секундарни во однос на некои други приоритети на режисерот и продуцентот.
СО ПОПОВ СНИМИ УШТЕ ТРИ ФИЛМА
Арсовски пред овој филм, играше во многу значајни македонски филмови со потписот на Попов, како „Среќна нова 1949“, „Тетовирање“, „Џипси меџик“. И покрај долгогодишното професионално и приватно пријателство, последното искуство ставило крај на соработката.
„Можам да ја направам разликата во работата на претходните филмови и онаа на ‘До балчак’. Се чувствуваше неискреноста уште на старт. Долго ја чекавме реализацијата на овој филм бидејќи сценариото беше подготвено одамна и за мене беше возбудлив предизвик да играм во него. Во филмот нема лага, сè што се случува во процесот на правење, подоцна ќе се види во филмот. Ако гледам како публика, филмот не ми се допаѓа, а како учесник, до денеска не можам да разберам како се случи толкава манипулација и кражба од страна на Столе Попов и Данчо Чевревски“.
Според еден од оштетените угостители, познатиот битолски сопственик на хотелот „Де Ниро“, Драги Филевски, речиси е невозможно некој да одговара за оваа измама иако тој спорот го добил на суд и очекува наплата од извршител.
Нему продукцијата му останала должна околу 3 милиони денари и го оштети толку за да мора да стави клуч на реномираниот хотел. Се обратил и до Агенцијата за филм и до Министерството за култура, но тие се оградиле како сосема ненадлежни во овој спор.
„Експресно добив на суд, тука немаше ништо спорно. Но, како извршителот да ги наплати средствата, тоа е друго прашање. По завршувањето на филмот, продукциите беа затворени со неважечки сметки и практично нема од кого да се наплатат парите. Последен пат тогашниот директор на Агенцијата за филм, Дарко Башевски, ми рече дека парите што ќе се заработат од продажбата на филмот ќе бидат наменети за враќање на долгот, но ништо од тоа не се случи “, ни рече Филевски.
Сите скандалозни етикети што го проследија филмот „До балчак“, од однесувањето на режисерот Столе Попов на црвениот тепих на фестивалот „Браќа Манаки“ до долговите на досега најскапиот македонски филм, не оставија многу простор за уметничка валоризација. Од тоа што малку се напиша, локалната критика го оцени лошо, а публиката не го засака.
Во текот на снимањето филмската екипа ја посети тогашниот претседател на Владата, Никола Груевски, кој ветуваше дека за овој филм нема да се штеди, па дури двапати ја одврза државната каса, откако Попов го пробиваше буџетот.
Според некои проценки, филмот со колосалната загуба (речиси една четвртина од вредноста на проектот) која го води во „була“, а ветувањето дека долгот ќе се покрие со проекциите и заработувачката од билетите е невозможно.
Пресметката покажува дека во најдобриот резултат на кинодистрибуција на филмот во сите киносали во земјава (две во Скопје и 19 низ Македонија), може да се заработат најмалку 150.000 евра во две недели проекција. Ова е време во кое би се исцрпел интересот за делото кај киногледачите. Излегува дека тоа е само една петтина од долговите, па и оваа приказна за одложен надомест на хонорарите за актерите и отштетата на битолските дуќанџии паѓа лесно во вода.
Одговорноста за „пропаста“ на овој голем филмски проект, веројатно, никој никогаш нема да ја понесе, но и натаму се очекува конечна правна разврска. Отворено останува и прашањето дали, сепак, постоело однапред подготвено сценарио за преточување на националниот во личен интерес, со многу оштетени во процесот.
За „До балчак“:
Сценариото е на Горан Стефановски, директор на фотографија Апостол Трпески, сценограф Миленко Јеремиќ, костимограф Емилија И. Атанасовска. Улогите ги играат Инти Шрај, Мартин Јордановски, Сенко Велинов, Тони Михајловски, Петар Арсовски и други.
Филмот е снимен во продукција на „Триангл филм“. Постпродукцијата е дело на продуцентската куќа „Fx3x“. Снимањето на филмот почнало во мај 2012 година а филмот е сниман во Битола, Скопје, Демир Хисар, Охрид, Штип и Прилеп. Буџетот изнесува 3,6 милиони евра од кои 2,5 милиони ги обезбедила владата, а 500 илјади евра обезбедил Филмскиот фонд.
Остана запаметена последната реплика на актерот Сашо Коцев во „До балчак“ кога вели „Ебати животот ако не си спремен да умреш за него“.
( Повеќе за ставите на Петар Арсовски, за филмот „До балчак“, македонската кинематографија, општеството, политиката, колегите… во видео интервјуто за Макфакс што ќе биде објавено викендов)
А. Василевска
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.