Daily news
(ВИДЕО) СДСМ предлага четири алтернативи место патни трошоци на пратениците
Томислав Тунтев, координатор на пратеничката група на СДСМ и коалицијата во Собранието, изјави дека пред две недели СДСМ предложил нов начин на пресметка на патните трошоци на пратениците.
„Евидентно е дека прашањето е актуелно и ова е доказ дека не бегаме од актуелни прашања и сакаме да дебатираме со јавноста, а тоа оди преку медиумите. Прво, сите се сеќавате дека четири месеци, од Нова година до крајот на април, зборувавме дека не се потребни празни и јалови дискусии за нешто што е извесно, за избор на претседател на Собранието. Четири месеци се обидувавме да ги убедиме пратениците од ВМРО-ДПМНЕ дека нема потреба да се одолжуваат седниците, да се доаѓа секој ден, да се дискутира едно исто со реплика на реплика. Секое доаѓање на пратениците значи и патни трошоци. Јас сум од Охрид, патувам секој ден. За да дојдам на работа, мене ми се потребни пет часа дневно во автомобил, возам 350 километри во денот и немам избор. Тоа е регулирано законски, со Законот за платата и други надоместоци на пратениците во Собранието и другите избрани и именувани лица и со Одлуката за висината за надоместокот, што ја носи Комисијата за избор и именувања во ова Собрание. Значи, една од причините за големиот број доаѓања на пратениците беше токму таа и ние со месеци укажувавме дека непотребно доаѓаме и дека непотребно им се трошат парите на граѓаните“, вели Тунтев.
Тој додава дека пратеничката група на СДСМ и тој како координатор пред две недели на координаторите на другите пратенички групи им дале конкретен предлог со четири разработени алтернативи како да се укинат патните трошоци, односно кои се начините за можно регулирање на привремениот престој и патување на пратениците што се од внатрешноста.
„Моментно, од 120 пратеници, 71 пратеник го задоволува условот да наплаќа за доаѓање на работа, неколкумина живееме на поголеми растојанија од Скопје. Ние не сме виновни што живееме во Охрид, Струга, Вевчани, Дебарца, Лабуниша и така натаму. Тоа се пресметува според формула, меѓутоа знаеме во каква држава живееме и каква е економската состојба, знаеме дека не е во ред за некој месец надоместокот што го добиваме за патни трошоци да биде поголем од платата. Па зошто ме плаќа мене државата? Да бидам шофер или да бидам пратеник кој ќе учествува во законодавниот процес? И знаејќи дека начинот на кој е ова регулирано не е добар, ние како политичка партија изготвивме неколку алтернативи. И во изборната програма рековме дека ќе го реформираме начинот на исплата на патните трошоци“, вели Тунтев.
Тој објаснува дека се работи за четири алтернативни решенија: „Едното е постојно, меѓутоа да се регулира подобро за да не се злоупотребува. Најголемиот проблем во сегашниот начин во исплата на патните трошоци е злоупотреба на системот. Имало и има пратеници што не патуваат секој ден, а кои наплаќаат патни трошоци. Со алатки, механизми и активности кои би го спречиле тоа драстично ќе се намали сумата на патни трошоци што се исплаќа на месечно ниво. Вие знаете дека во некои месеци имаме 25 работни дена, а во мај имавме два работни дена. Значи, не може да се прави просек. Никој од јавноста или медиумите не прашал зошто другите именувани функционери имаат службени возила и имаат право на истиот надомест, директори, заменик-министри и така натаму… секогаш на удар се пратенците. Јас како координатор на пратеничка група морам и ќе се грижам секогаш за достоинството на пратениците“, објаснува Тунтев.
Втората алтернатива што ја понудил е станови на користење – службени, државни. „Порано беше практика да се користи станот за време на мандатот, меѓутоа во петок, сабота и во недела да им се даваат на пратениците за да комуницираат со своите гласачи од местото од каде што доаѓаат“, додава тој.
Третата алтернатива што ја нудат е давање надомест за одвоен живот и за изнајмување стан под кирија. Четвртата алтернатива е хотелско сместување, избрано преку тендер, и за кое ќе се одлучи во Собранито или службите на Собранието.
„Алтренативите се производ на сеопфатна обемна анализа, како, на кој начин и колку се исплаќаат патните трошоци на име на пратеници и јас ова го нарачав по моето доаѓање за пратеник во овој дом. Парламентарниот институт на Собранието на Република Македонија направи компаративна анализа за надоместоците за пратеници во одредени земји, ги зедовме земјите од опкружувањето, Југоисточна Европа и земјите од Европа. Сето ова што како предлог им е дадено на моите колеги координатори на разгледување е изготвено врз сеопфатна компаративна анализа и позитивни практики во другите земји“, вели Тунтев.
Тој додава дека пратеници од пратеничката група на СДСМ и коалицијата во неколку наврати дел од патните трошоци донирале во хуманитарни цели. „Во минатиот состав трипати дониравме во хуманитарни цели, имаме направено фонд за донации и сè уште ќе донираме, ама тоа не е за јавност, секој пратеник одлучува како ќе се однесува со парите што законски му следуваат.
Доколку во разумен рок до крајот на месецот добиеме мислења и ставови за одредени прашања, јас и тим од СДСМ сме подготвени да седнеме и да разговараме за посебна регулација на ова прашање, доколку не, тогаш како партија од мнозинството ќе предложиме нови законски решенија, односно нови одлуки од страна на Комисијата за избори и именувања со кои основната цел ќе биде да се намалат вкупните средства што се извојуваат за патни трошоци, а второ, да се спречат сите злоупотреби, кои очигледно во годините претходно биле реалност во овој законодавен дом“, вели Тунтев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.