Daily news
(Видео) Средба Заев-Гремингер: ОБСЕ ја поддржува Македонија на патот кон ЕУ и НАТО
Претседателот на Владата на Република Македонија, Зоран Заев, денеска се сретна со генералниот секретар на ОБСЕ, Томас Гремингер. На средбата беше потврдена цврстата определба на Владата на Република Македонија за заштита на човековите права, функционирањето на правната држава и посветеноста на реформскиот процес и поддршката што Владата на Република Македонија ќе продолжи да ја добива од ОБСЕ во реализацијата на реформскиот процес.
По средбата, премиерот Заев и генералниот секретар на ОБСЕ, Гремингер, одржаа заедничка прес-конференција на која ги потврдија заложбите за понатамошно интензивирање на соработката помеѓу земјата и ОБСЕ во насока на продолжување на демократските процеси за кои се очекува да резултираат со полноправно членство на Македонија во ЕУ и НАТО.
„Ја потврдивме цврстата определба на новата Влада на Република Македонија за заштита на човековите права, функционирањето на правната држава и посветеноста на реформскиот процес. Работиме и ќе работиме во согласност со стандардите на Европската Унија и на ОБСЕ во сите важни области за граѓаните и за државата затоа што ја гледаме иднината на Република Македонија во ЕУ“, изјави премиерот Заев.
Заев истакна дека со посебно внимание ќе се работи на воспоставување непристрасен, професионален и ефикасен судски систем во согласност со препораките на Европската комисија, на Венециската комисија на Советот на Европа.
„Се согласуваме со прелиминарната изјава на ОБСЕ/ОДИХР за изборите, кои се оценети како демократски и конкурентни, со почитување на човековите права и потребата за цврсти заложби за јасна поделба меѓу државата и политичките партии и обезбедување услови за балансирано медиумско известување, што е меѓу нашите приоритети во работењето како Влада“, порача премиерот Заев.
Тој посочи дека интензивно се работи на градење едно општество, со што се подобрува имплементацијата на Охридскиот рамковен договор, на унапредување на добрососедските односи низ пријателски пристап за решавање на сите прашања во интерес на граѓаните и во таа насока премиерот Заев посочи дека се забележуваат првите придвижувања, преку договорот со Бугарија, транспортната заедница, регионалната економска соработка, односите на доверба со Грција.
Генералниот секретар на ОБСЕ, Гремингер, ги охрабри сите вклучени страни да работат заедно на зајакнување на демократските процеси и на враќање на довербата во државните институции за кои рече дека треба да бидат транспарентни, отчетни и инклузивни за да се осигури просперитетна иднина за сите граѓани на земјата.
„ОБСЕ и институциите на нашата организација и нашата мисија во Скопје се овде да ве поддржиме и продолжуваме со партнерскиот однос што го негуваме во соработката со државните институции и поддршката на реформите во клучните области“, истакна генералниот секретар Гремингер.
На самиот крај од своето обраќање генералниот секретар Гремингер се заблагодари за силната поддршка што земјата ѝ ја дава на мисијата на ОБСЕ, повика да продолжи соработката и да се искористи во целост вредносниот потенцијал на мисијата и порача дека 2017 година е важна како јубилеј на 25 години од работењето на мисијата во земјата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.