Daily news
Вилијамс и Клиперси го растурија шампионот (Видео)
ЛА Клиперс во Оукланд забележа победа над Голден Стејт вориорс 125:106 со што ја прекина серијата од пет победи во која се наоѓаа играчите на актуелниот шампион.
По израмнетата игра во првото полувреме Голден Стејт успеа да се одлепи на разлика од девет поени, но во средишницата на третиот период Клиперси ја стигнаа и престигнаа предноста на домаќинот, која само ја зголемија во последниот квартал во кој на Голден Стејт му дозволија да постигне скромни 16 поени.
Лу Вилијамс беше клучниот играч на Клиперси, тој постигна рекордни во кариерата 50 поени (27 во третиот период), на кои придодаде 2 скока и 7 асистенции. Центарот Деандре Џордан забележа двоен ефект од 10 поени и 12 скока, а Тајрон Волас постигна 22 поени.
Голден Стејт го предводеше Кевин Дурент со рекордни сезонава 40 поени, а само уште Заза Пачулија (12 поени), постигна двоцифрен број поени во редовите на актуелниот шампион.
Блескава вечер имаше и Финецот Лаури Марканен, кој го предводеше Чикаго до победата во Њујорк 122:119.
Марканен натпреварот го заврши со 33 поени и 10 скока, со што го поништи трипл-дабл ефектот (16 поени, 10 скока, 10 асистенции) кој на спротивната страна го оствари Џарет Џек.
Резултати:
Шарлот Хорнетс-Далас Маверикс 111:115
Индијана Пејсерс-Мајами Хит 106:114
Вашингтон Визардс-Јута Џез 104:107
Бруклин Нетс-Детроит Пистонс 80:114
Хјустон Рокетс-Портланд Трејлблејзерс 121:112
Мемфис Гризлис-Њу Орлеанс Пеликанс 105:102
Милвоки Бакс-Орландо Меџик 110:103
Минесота Тимбервулвс-Оклахома Тандер 104:88
Денвер Нагетс-Атланта Хокс 97:110
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.