Daily news
Вмровскиот празник масовно ќе се слави во Банско и на Малта
Во туристичките агенции нема слободни места за продолжен викенд во Бугарија. Македонците в сабота масовно ќе заминат на три дена, најмногу во Банско. На листата најбарани дестинации во нашите агенции веднаш зад Банско е Малта, следуваат Истанбул, Будимпешта и Сутоморе.
Само туристичката агенција „Бисер пром“ за празникот ќе испрати во Банско 4 автобуси, а местата им се потполнети и на сите други агенции што го нудат овој зимски центар.
„Распродадовме сè што имавме уште пред една недела. Првите резервации ги добивме уште пред еден месец. Најголем е интересот за хотелите со четири ѕвездички. Ние нудиме пакет-услуга, односно превоз, сместување на база полупансион со користење спа и бесплатен интернет по популарна цена од 3.500 денари за две ноќевања. Автобусите се полни, немаме повеќе места, но нема место ниту за заинтересираните за патување со сопствен превоз. Имавме двапати повеќе заинтересирани за патувања со сопствен превоз и ги исполнивме сите капацитети што ни беа на располагање. Од контактите со бугарските колеги дознавме дека претстојниот викенд 90 отсто од гостите во Банско ќе бидат Македонци“, вели Петар Дончевски од „Бисер пром“.
Тој викендов очекува голем метеж на границата со Бугарија, но нагласува дека за автобусите има посебна лента, па патниците со пакет-аранжманите побргу минуваат во споредба со приватните автомобили.
Уште некое место за Банско може да се најде во агенциите „Пет“ и „Кондор“, но во скапите хотели со пет ѕвездички. И тие нудат пакет-услуга со превоз и веќе имаат полни автобуси, еден агенцијата „Пет“, најмалку два агенцијата „Кондор“. Од „Пет“ велат дека и покрај тоа што имале понуда за „Дракула турата“, за Венеција, Мурано, Бурано, интерес во агенцијата имало само за Банско.
По еден голем автобус за Истанбул, за Будимпешта и за Сутоморе за празникот ќе испрати „АС транс“, а сигурна реализација на турата за Истанбул најави и агенцјата „Нехар травел“.
Разлика за овој празник направи туристичката агенција „Атлас – Скопје“. Кај нив најбарана понуда за овој празник била посетата на Малта.
„Иако имавме голема и разновидна понуда за празникот, интерес има само за Малта и за Банско. За Малта успеавме да наплониме еден авион, сè е распродадено, нема повеќе места, а се полнат и последните места за Банско што ги нудиме за патници со сопствен превоз. Голем интерес овој октомври имаме и за сити брејк понудата што ја правиме по барање на патникот, а не е врзана со датуми ниту, пак, со оформување група, а се покажа и дека е поевтина отколку групните патувања“, вели Маја Димитриевска, сопственичка на „Атлас“.
Годинава 23 Октомври, Денот на македонската револуционерна борба, се паѓа в понеделник. Не е работен оти од 2007 година е прогласен за државен празник, па сите граѓани добиваат продолжен викенд од три дена. Измената на Законот за празниците ја направи ВМРО-ДПМНЕ во првата година од 11-годишното владеење, па граѓаните го нарекоа вмровски празник.
М.И.П.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.