Daily news
ВМРО-ДПМНЕ: Заев да одговори зошто се запрени крупните капитални инвестиции
![](https://makfax.com.mk/wp-content/uploads/2017/11/vmro-dpmne-sediste11-1200x545_c.jpg)
Зоран Заев и Драган Тевдовски повторно сакаат да ја изманипулираат јавноста, реагираат од опозициската партија ВМРО-ДПМНЕ во однос на денешната прес-конференција на премиерот и министерот за финансии.
Оттаму истакнуваат дека наместо празни зборови, владините функционери треба да ги исполнат своите ветувања за подобрување на животниот стандард на граѓаните.
„Заев и Тевдовски се пофалија за реализацијата на капиталните инвестиции за 2017 година, но повторно не одговорија на прашањата зошто крупните капитални инвестиции беа запрени или не беа пуштени во употреба. Автопатската делница Демир Капија – Смоквица повеќе од 6 месеци е завршена, а граѓаните и туристите немаа можност да ја користат. Автопатските делници Скопје – Штип и Кичево – Охрид беа во прекин на градба повеќе месеци“, наведуваат од центарот за комуникации на ВМРО-ДПМНЕ.
Од пратијата истакнуваат дека по неколку години БДП во Македонија доживеа пад.
„Македонија во првите 3 квартали имаше пад на БДП од 0,4%, додека, пак, бруто инвестициите се намалија за над 9.5% во третиот квартал од 2017 година. За првпат во Македонија, во третиот квартал НБРМ регистрираше одлив на странски инвестиции за околу 50 милиони евра. Под водство на Драган Тевдовски, Министерството за финансии стана рекордер во задолжување и трошење на девизните резерви. Македонија изминативе 7 месеци се задолжи за над 730 милиони евра, од кои потрошени се над 230 милиони евра од девизни резерви“, се вели во соопштението на ВМРО-ДПМНЕ.
Оттаму предупредуваат дека со владеењето на СДСМ малото и средното стопанство во Македонија стагнира и дека голем број мали фирми и претпријатија се пред затворање.
„Заев за волја на вистината, повторно пробува да се кити со туѓи перија како и секогаш. Тој се пофали за 96% за искористеност на ИПА фондовите, од кои Заев заборави да напомене дека над 90% беа искористени во времето на ВМРО-ДПМНЕ од програмата 2007-2013, средства кои почнаа да се користат во февруари 2008, а заврши на крајот од декември 2017“, наведуваат од опозициската партија.
Од ВМРО-ДПМНЕ потенцираат дека изминативе неколку месеци најпогодена категорија на граѓани биле земјоделците.
„Погубните политики на СДСМ ги принудија земјоделците својот род да го фрлаат или да го оставаат да скапува на нивите. Немаше откуп за нивниот производ, а поддршката од Владата на Заев никаде ја немаше“.
Оттаму исто така наведуваат дека најголемото ветување на Заев и Тевдовски, како што велат, испадна само еден голем маркетиншки трик.
„Пред изборите во октомври месец тие ја воведоа евтината струја, за по избори да најават нејзино укинување. Граѓаните повторно беа излажани. СДСМ и Заев единствено удрија по џебот на секој граѓанин. Од први јануари е зголемена акцизата за нафта за 3,5 денари по литар. Ова е голем економски удар за превозниците, земјоделците, но и секој обичен граѓанин“, заклучуваат од центарот за комуникации на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
![](https://makfax.com.mk/wp-content/uploads/2024/05/thumbnail_The_Business_of_Pleasure_2.jpg)
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
![](https://makfax.com.mk/wp-content/uploads/2018/03/1-1-3.jpg)
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
![](https://makfax.com.mk/wp-content/uploads/2018/08/gruevski-sud.jpg)
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.